Mualliflik huquqini buzgan ijodkorlarning lisenziyalari bekor qilinishi mumkin, deb xabar bermoqda Adliya vazirligi.
Qayd etilishicha, qonunchilikka muvofiq litsenziya talablari va shartlari litsenziat tomonidan muntazam ravishda yoki bir marotaba qo‘pol ravishda buzilganda litsenziyalovchi organ litsenziyaning amal qilishini bekor qilishni so‘rab sudga murojaat qilishi lozim.
Konsert-tomosha faoliyatini amalga oshirayotgan ijrochilar tomonidan mualliflik huquqi va turdosh huquqlarni buzish litsenziya talablari va shartlarini qo‘pol ravishda buzish deb hisoblanadi.
Shunga ko‘ra, Adliya vazirligi tomonidan shoir va bastakorlardan kelib tushgan murojaatlar asosida 2024 va 2025-yilning o‘tgan davri mobaynida mualliflik huquqini buzgan va sud qarorlariga asosan ma’muriy javobgarlikka tortilgan 10 nafar ijrochilarga oid ma’lumotlarni “O‘zbekkonsert” davlat muassasasiga taqdim etib, ularning litsenziyalarini bekor qilish bo‘yicha zarur choralarni ko‘rishni so‘radi.
O‘zbekiston xalq artisti Yulduz Usmonova san’atkorlarning bugungi holati haqida murojaat bilan chiqdi. Uning fikriga ko‘ra, bugun ko‘plab san’atkorlar ijod qilishdan sovib qolgan. Buning sababini esa u mualliflik huquqlari atrofidagi chalkashliklar, eski asarlar bo‘yicha ochilayotgan da’volar va ijodkorlarga bo‘lgan bosimlar bilan bog‘laydi.
Bundan avval xonanda Feruza Karimova qo‘shiq ijrosida she’rdan ruxsatsiz foydalangani uchun muallifga 40 mln so‘mdan ziyod to‘laydigan bo‘lgandi.
Shuningdek, Rayhonning “Yaxshimasmi” qo‘shig‘ida she’rdan muallif ruxsatisiz foydalanilgani aniqlangandi. Shoir Shamsiddin Sadoiyning Adliya vazirligiga qilgan murojaati asosida “Davlating borida”, “Omonat” va “Tingla do‘stim” nomli sheʼrlari xonanda Botir Qodirov tomonidan huquq egasi ruxsatisiz hamda tegishli tartibda mualliflik haqini to‘lamasdan foydalanilgani aniqlangan. Yana bir mashhur shoir xonanda Botir Qodirov ustidan Adliyaga shikoyat qilgan.
Abdussamiy taxallusi bilan bilan tanilgan shoir Shohrux Abduvohidovga tegishli “Qizg‘anaman”, “So‘nggi nafasgacha”, “Sog‘indim yomon” hamda “Dildora” nomli sheʼrlar xonanda Botir Qodirov tomonidan huquq egasi ruxsatisiz hamda tegishli tartibda mualliflik haqini to‘lamasdan foydalanilgan.
Manzura va Murodjon Yo‘ldoshev esa “Azizim” qo‘shig‘ini muallif ruxsatisiz kuylagani maʼlum bo‘lgandi.
Izoh (0)