Собиқ Фарҳод ва Ширин дуэтининг хонандаси Фарҳод Сулаймонов интервьюсида продюсери билан узоқ давом этган суд жараёнлари ва унинг талаблари ҳақида гапирганидан кейин, бунга жавобан Бобур Бобомурод ҳам ўз муносабатини билдирди.
— Бу мавзуни ёпганимга 4-5 йил бўлиб қолганди, аммо ўша вақтда ҳам бу ҳақда интервью бермагандим. Аммо Фарҳод Сулаймоновнинг интервьюсини ташлаб беришгандан кейин ҳар хил гаплар кўпайиб кетди. Бу ҳақда билмай туриб, бир инсоннинг фикри билан хулоса чиқараётганлардан хафа бўлиш керак эмас. Инсон савиясидан келиб чиққан ҳолда, масалага бир томонлама ёндашиб, бир инсонни ҳақоратлаши мумкин, деб ҳисоблайман. Гуруҳнинг тарқалишига келсак, ташаббус айнан ўша йигит Фарҳод Сулаймоновдан бўлган. Улар айтганидек, олдимга дуо сўраб келмаган. Фақат келиб “Сиз билан ҳамкорликни тўхтатамиз, сиз билан 10 йил ишладик, етади”, дейишди. Албатта, бу гаплар бир кунлик эмас. Аввал у йигит ўзи яккахон ижод қилмоқчи бўлганди.
Бундан 10-15 йиллар аввал улар ёнимга келиб, даромаднинг 50 фоизи сизга дейишганида, “Йўқ, топганимиз тенг бўлинади”, деганман. Бирданига улар айтганидек, гуруҳ катта фойда олиб келмаган. Яхши даромадга энди-энди чиқилаётган вақтда унга шерик бўлишимни истамасдан, кетишди. Афсуски, ўзлари бошлаган фаолият ҳам узоқ давом этгани йўқ. Майли, мен билан ишлашмади, хоҳлашмади, аммо шунча йиллик меҳнат зое кетганидан афсусланаман, дейди Бобур Бобомурод.
Бобур Бобомурод ҳеч кимни судга бермагани ва уларнинг бирортасида иштирок этмагани ҳақида гапирди.
— Масалага файласуфона қарайман, бу ҳаётда 40 йил бирга яшаган эр-хотинлар ҳам ажралиб кетиши мумкин. Шоу-бизнесда бундай ҳамкорликнинг тўхталиши тез-тез бўлиб турадиган жараён. Фақат тушунмаётганим, орадан шунча вақт ўтганидан кейин бу гапларни қўзғашнинг нима кераги бор эди?
“Судда ғалаба қилдик”, дебди. Биринчидан, мен уларни судга берган эмасман, 10-15 та суд бўлганидан ҳам хабарим йўқ. Уларнинг бирортасида ҳам иштирок этган эмасман. Мен Муаллифлар ҳуқуқини ҳимоя қилиш палатасига аъзоман. Судга мени ҳуқуқимни ҳимоя қилиш мақсадида, улар судга даъво аризаси билан мурожаат қилган. Агар ўзим судга берганимда, адвокат ёллаб бўлса ҳам, охиригача борган бўлардим. Аммо биламан, Аллоҳнинг адолатидан улуғроқ адолат йўқ. Судларда иштирок этмаслик шарти билан палатага ариза берганман. Қонуний томондан ҳақлигим шундаки, Фарҳод ва Ширин бренди менда бўлган, дунё бўйича продюсер турли сабаблар билан гуруҳ фаолият юритмай қўйгандан кейин унинг номини, ёки қўшиқларини бошқа хонандаларга бериши мумкин. Интервьюда шеър дейилибди, аммо улар орасида қўшиқлар ҳам бор. Чунки шеърини мен ёзмаган, аммо шундай қўшиқ яратишни таклиф қилган, ғоя берган қўшиқларим ҳам бор.
Майли, бу воқеалар ўтди-кетди, қўшиқлар халқнинг мулкига айланиб улгурди. Мен ҳам, улар ҳам қўшиқларни ўзимиз билан олиб кетмаймиз. Бу қўшиқларни бировга айттирганим билан унга ярашадими-йўқми, буниси ҳам масала. Шунинг учун мен талашганим йўқ.
Бобур Бобомурод шеърларини тақдим этаётганида юридик томонлама ёндашмагани ва уларга ишонгани ҳақида гапирди.
— Мен одамларга ишонаман. Уларга мен билан ишлаш манфаатли бўлганки, 10 йил бирга ишлашди. Тасаввур қилинг, бу худди бир машина ихтиро қилинганки, улар уловда сафарга отланишган. Аммо ярим йўлга етмай, бир ихтирочини эшикдан ирғитиб юбориб, ўзлари йўлда давом этишди. Менга ҳам худди шундай муносабат бўлди. “Майли, менсиз ижод қилмоқчи экансизлар, қонун бўйича Фарҳод ва Ширин бренди бўйича бошқа гуруҳ қилишим мумкин-ку, ғояларим асосида яратилган қўшиқларни бошқаларга айттиришга ҳаққим бор”, дедим. Аммо бу гапим уларга ёқмади. Аммо бу ҳам нотўғри-да, улар ҳамма нарса билан кетади-да, мен ҳеч нарсасиз қоламанми? Ўтган вақт давомида менинг қанча соғлиғим, меҳнатим кетди. Ҳеч нарса ўз-ўзидан бўлиб қолгани йўқ. Улар билан ҳамкорликни бошлаганимда ҳатто маблағи ҳам йўқ эди, ҳатто аввалги продюсеридан катта қарз билан келишган. Икки йил ишлаб, бирга қарзини тўлаганмиз. Наҳотки ана шу кунларни унутиб қўйишди, дейди Бобур Бобомурод.
Шоир Фарҳод Сулаймоновнинг қайси гапи унинг фарзандларига оғир ботгани ва улар отасидан бунга қонуний чора кўришни сўрашгани ҳақида гапирди.
— У йигитнинг айтишича, гуруҳ бола-чақамни ҳам моддий таъминлаши керак, деган эканман. Аммо ўртада бундай гап бўлгани йўқ. Аммо дунёдаги муаллифлик ҳуқуқлари бўйича, ҳар қандай ижод маҳсули у вафот этганидан кейин ҳам 70-75 йил мобайнида ижоддан келадиган фойдадан унинг фарзандлари ва набираларига улуш ажратилади. Буни мен эмас, қонун белгилаб берган.
Интервьюдаги бу гаплар фарзандларимга оғир ботди. Чунки уларнинг ҳам ўзига яраша обрўси, жамиятда ўз ўрни бор. Шукрки, улар берадиган пулга қараб қолган жойлари ҳам йўқ. Болалар мен номини билмайдиган қимматбаҳо машиналарда ҳаракатланишади. “Бу масалага қонуний чора кўринг”, дейишди. “Индаманглар”, дедим. Чунки у йигит нима дейишидан қатъи назар, барибир шогирдим, бир пайтлар устоз-устоз деб этагимни тутган, дейди Бобур Бобомурод.
Изоҳ (0)