UFC президенти Дана Уайт 2026 йилда АҚШ Мустақиллик декларациясининг 250 йиллиги муносабати билан Оқ уйда ўтказилиши режалаштирилаётган UFC мусобақасида қайси жангчилар иштирок этиши мумкинлиги ҳақида фикр билдирди.
MMA Fighting нашрига берган интервьюсида Уайт турнирда ирландиялик Конор Макгрегор ҳамда америкалик Жон Жонс каби машҳур жангчилар қатнашиши мумкинлигини маълум қилди:
Мен Конор Макгрегорга ишонаман. Агар оғир жароҳат олмаса, у ҳеч қачон мени ярим йўлда қолдирмаган. Аммо Жон Жонс борасида бир оз кўпроқ шубҳам бор, — деди UFC раҳбари.
Аввалроқ Макгрегор ҳамда Жон Жонс Оқ уй мезбонлигида ўтиши кутилаётган UFC турнирида жанг қилиш истагини билдирган эди.
Эслатиб ўтамиз, Конор Макгрегор сўнгги бор 2021 йил июль ойида UFC 264 турнирида америкалик Дастин Порьега қарши октагонга чиқиб, оёғидан олган жароҳати сабабли техник нокаут билан мағлуб бўлган эди. Жон Жонс эса 2008 йилдан 2024 йилгача профессионал жангчи сифатида фаолият юритган.
Изоҳ (0)