Республикада тўрт ойдан ортиқ вақт ичида 1,1миллион янги иш ўрни яратилди. Бу ҳақда Бандлик вазирлиги Меҳнат инспекцияси раҳбари ўринбосари Нилуфар Аманниязова “Дарё”га берган интервьюсида маълум қилди.
Нилуфар Аманниязованинг айтишича, янги иш ўринларининг асосий қисми қишлоқ хўжалиги, қурилиш, хизмат кўрсатиш соҳаларида ҳамда ўз-ўзини банд қилганлар ҳисобига таъминланган.
“Жорий йилнинг ўтган даврида республика бўйича 1,1 миллион янги иш ўринлари яратилди. Иш ўринлари ҳисоботи қуйидагича шакллантирилади: А корхонада 10 нафар одам ишга қабул қилинди. Иш берувчи Ягона миллий меҳнат тизимидан меҳнат шартномасини рўйхатдан ўтказади, ишга қабул қилинган ходим бўйича иш берувчи кейинги ойнинг 15-санасигача даромад ва ижтимоий солиқ тўлангани тўғрисида ҳисобот топширади. Солиқ ҳисоботлари асосида тасдиқланган иш ўринлари янги иш ўрни деб ҳисобга олинади. Янги иш mehnat.uz ҳамда солиқ органларининг ахборот тизимлари билан интеграция қилинган бўлиб, ҳисоботларни шакллантиришда инсон омили мавжуд эмас”, деди инспекция масъули.
Шу билан бирга, инспекция норасмий ишлаётганлар фаолиятини расмийлаштириш йўналишида ҳам ишламоқда.
“2025 йил февраль ойидан бери инспекторлар мамлакат бўйича 22 минг 900 та норасмий ишчилар фаолиятини легаллаштирган. Легаллаштириш асосан қурилиш, ишлаб чиқариш, умумий овқатланиш ва хизмат кўрсатиш соҳаларига тўғри келди”, дейди Нилуфар Аманниязова.
Қайд этилишича, инспекция вакиллари корхоналар раҳбарларига ишчиларни нолегал ишлатишнинг салбий оқибатларини тушунтирмоқда. Фаолияти легаллаштирилган ходимлар махсус дастур орқали доимий кузатувда бўлиб, қайта норасмий ишлашга йўл қўйилмаслиги таъминланмоқда.
Изоҳ (0)