Пахта мавсумида ишонч телефони ҳамда ижтимоий тармоқлар орқали мажбурий меҳнат ва меҳнат ҳуқуқлари бузилишига оид 283 та мурожаат келиб тушган. Бу ҳақда АОКАда бўлиб ўтган брифингда Камбағалликни қисқартириш ва бандлик вазирлиги Давлат меҳнат инспекцияси бошлиғи Абдусамад Абдукаримов маълум қилди.
Айтилишича, мурожаатларнинг 26 таси мажбурий меҳнатга жалб қилинганлик, 27 таси муносиб меҳнат шароитлари яратилмаганлиги, 219 таси терим пуллари ўз вақтида берилмаётганлиги ва қўлда териладиган1 кг пахтанинг нархи тўғрисидаги мурожаатлардир.
Ўрганишлар давомида 37 та мурожаат қаноатлантирилган, 200 га яқин мурожаат бўйича теримчилар ва иш берувчиларга тушунтиришлар берилган, 35 та мурожаатдаги важлар ўз тасдиғини топмади.
Давлат меҳнат инспекцияси ходимлари томонидан ўрганиш натижаларидан келиб чиқиб, 13 та фермер хўжалиги раҳбарларига ёзма кўрсатма, 5 нафар мансабдор шахсга нисбатан маъмурий баённомалар расмийлаштирилган.
Ўзбекистонда пахта теримига мажбурлаш билан боғлиқ ҳолатлар Сенатнинг Одам савдосига қарши курашиш ва муносиб меҳнат масалалари бўйича миллий комиссияси томонидан назоратга олингани хабар қилинган эди.
Изоҳ (0)