Ижтимоий тармоқда Тошкент вилояти Соғлиқни сақлаш бошқармаси бошлиғи Улуғбек Абдуғаниевнинг вилоятда икки кунлик ҳашар эълон қилингани, унда тиббиёт ходимлари қатнашиши шартлигини айтган аудиоси тарқалди.
Овозли хабарда Абдуғаниев вилоят, туман ва шаҳар тиббиёт бирлашмалари раҳбарларига “ўзини эркакман деган” шифокорлар ҳашарга чиқиши зарурлигини таъкидлаган.
“Бугунги ҳашар якунланяпти. Расмлардан иборат ҳисоботларга қарайдиган бўлсак, барча тиббиёт муассасаларида аксарият ҳашарда иштирок этганлар ўрта ва кичик тиббиёт ходимлари, бошқа хўжалик бўлимларидаги ходимлардан иборатлигини кўриб турибмиз. Ҳар бир раҳбарга топшириқ: эртага эрталабдан эркак шифокорларни олиб чиқиб, ҳашарда ишларни ташкил қиласизлар. Бу эркак шифокорларга на бир тартиб бор, на бир талаб бор. Билган ишини қилиб юрибди. Шу овозли хабар ҳар бир ўзини эркакман деган шифокорга етиб борсин. Эрталаб ҳашарда эркак шифокорлар қатнашиши шарт. Қўлингларда рўйхати бўлсин, кадрни бириктириб қўйинг. Келдими, нима иш қилди, қўлида асбоби билан кетмон, грабли, қайчи арра ва ҳоказо. Тўлиқ назоратга олинглар”,—деган у.
Kun.uz мухбири Улуғбек Абдуғаниев билан телефон орқали боғланиб, ҳолат юзасидан изоҳ олган. Суҳбатда ССБ бошлиғи тиббиёт ходимларини ҳашарга жалб қилишни мажбурий меҳнат деб ҳисобламаслигини айтган.
“Ҳар бир ҳудудда куз-қишга тайёргарлик, шанбалик, ахлатдан тозалаш, кўчат экиш ва бошқа ишларни амалга оширсин, деб топшириқ берганман. Уни қандай талқин қилишаётганидан эса хабарим йўқ. Йўқ, бу мажбурий меҳнатга кирмайди. Муҳтарам президентимизнинг ўзлари айтдилар. Мактаб, шифохона ҳудудида тозалаш ишларини олиб бориш қандай қилиб мажбурий меҳнатга киради? Ҳеч ким уларга кўчага чиқиб ишла деяётгани йўқ-ку”, – деган Улуғбек Абдуғаниев.
ССБ бошлиғи мактаб ва тиббиёт бирлашмалари ҳудудини тозалаш ўқитувчи ва шифокорларнинг функсионал вазифасига кирадими, дея берилган саволга ҳам жавоб қайтарган.
“Бундай ишлар ҳамшира ва ўқитувчиларнинг касбий вазифасига кирмайди, аммо ходимларнинг жамоа шартномасида уларнинг жамоавий, оммавий тадбирларда қатнашиши кераклиги Касаба уюшмалари ва бошқалар томонидан кўрсатилади. Ходимлар кўча тозалашга жалб қилинаётгани йўқ-ку. Ҳар бир ташкилот ҳудудида бўлимлар ободонлаштирадиган, қараб турадиган ҳудудлари бор, ўша жойларга масъул қилиб белгилаб қўйилган”, – деган у.
“Дарё” мухбири воқеанинг ҳуқуқий жиҳатлари бўйича изоҳ олиш мақсадида Камбағалликни қисқартириш ва бандлик вазирлиги ахборот хизмати раҳбари Фахриддин Ҳайит билан боғланди. Маълум қилинишича, ҳолат назоратга олинган.
“Ҳозирда Меҳнат инспекцияси вазиятни ўрганмоқда”, —деди вазирлик масъули.
Маълумот учун, Улуғбек Абдуғаниев 2023 йилнинг май ойида Тошкент вилояти соғлиқни сақлаш бошқармасига раҳбар этиб тайинланган.
Изоҳ (0)