Тошкент вилоятида вафот этган ходим учун тўланмаётган 340 млн сўм тўлиқ ундириб берилди, деб хабар бермоқда Камбағалликни қисқартириш ва бандлик вазирлиги.
![](/static/2024/09/05/pul-8fCZDmR3.jpg)
Маълум қилинишича, “Ҳудудий электр тармоқлари” АЖ Бекобод шаҳар электр тармоқлари корхонаси ходими Бунёд Мирбобоев 2023 йил 12 март куни электр ускуналарида ишлаб чиқаришдаги бахтсиз ҳодиса туфайли вафот этган.
Корхона унинг оила аъзоларига тўланиши лозим бўлган 340 миллион сўм миқдоридаги зарар пулларини 1 йилдан ортиқ вақт давомида тўламай келган. Давлат меҳнат инспекцияси аралашуви билан ушбу сумма марҳумнинг оила аъзоларига корхонадан тўлиқ ундириб берилди.
Аввалроқ Қашқадарёда якшанба куни ишга чиқиб, иш вақтида вафот этган ободонлаштириш ходими оиласига 167 млн сўм моддий ва маънавий зарар ундириб берилгани хабар қилинганди.
2024 йилнинг 6 ойи давомида содир бўлган 387 та бахтсиз ҳодиса оқибатида 416 нафар ходим жабрланган, 303 нафари оғир ва 12 нафари енгил тан жароҳати олган, 101 нафари вафот этган.
Бахтсиз ҳодисалар туфайли ходимлар ёки уларнинг оила аъзоларига 823 миллион сўмдан ортиқ товон пулларини ундириш юзасидан судларга даъво аризалар киритилиб, шундан 10 нафар фуқарога 274 миллион сўм ундириб берилди ва қолганлари бўйича жараён давом этмоқда.
Бахтсиз ҳодисаларнинг энг катта қисми — 26 фоизи қурилиш соҳасига тўғри келган.
Изоҳ (0)