“Дарё”да Тошкент шаҳрининг Янгиҳаёт туманидаги кўп қаватли уй қурилишида 23 ёшли йигитнинг бошига қолип тушиб кетиши оқибатида вафот этгани хабар қилинганди. Қурилиш ва уй-жой коммунал хўжалиги вазирлиги марҳумнинг ўлими эҳтиётсизлик ортидан келиб чиққанини маълум қилди. Ва буюртмачи, пудратчи ҳамда техник назоратчиларга қурилиш майдонидаги ишчилари учун хавфсиз шароитларни яратиб беришга масъул эканлигини ёдга солди.
Таъкидланишича, вазирлик 23 ёшли йигит ўлими билан боғлиқ воқеани ўрганиб чиққан.
Мазкур объект Вазирлар Маҳкамасининг 2022 йил 20 апрелдаги 200-сонли қарорига асосан Тошкент шаҳар қурилиш ва уй-жой коммунал хўжалиги соҳасида ҳудудий назорат қилиш инспекцияси томонидан ўрнатилган тартибда рўйхатга олинган. Буюртмачи New Times Buildings МЧЖ Давлат хизматлари агентлиги орқали Тошкент шаҳар Янгиҳаёт тумани “Янги дархон” МФЙ ҳудудида 4 та 17 қаватли уй-жойлар қурилиши учун рўйхатдан ўтган. Кейинчалик қурилиш ишлари субпудратчи King house МЧЖга топширилган.
Қурилиш-монтаж ишлари ҳудудий инспекция ходимлари томонидан мунтазам назорат қилиб борилган. Хусусан, бажарилиши зарур бўлган 10 та ёзма кўрсатма берилган. Бироқ иш жараёнидаги эҳтиётсизлик сабаб 2024 йилнинг 11 март куни қурилишда ишлаб келаётган, 2001 йилда туғилган Ш.Б.нинг бошига 14-қаватдан қолип-опалубка тушиб кетиши натижасида вафот этган, — дейилади вазирлик ахборотида.
“Дарё” журналистининг воқеа жойига бориб аниқлаштиришича, айни пайтда ҳудуд ўраб олинган. Кириб-чиқиш тўхтатилган.
Вазирлик буюртмачи, пудратчи ва техник назоратчиларга қурилиш майдонида шу каби кўнгилсиз воқеалар келиб чиқмаслиги учун улар ишчиларга хавфсиз шароит яратиб беришга масъул эканлигини эслатган.
Шу ўринда, қурилиш объекти иштирокчилари, хусусан, буюртмачи, пудратчи ва техник назоратчиларнинг қурилиш майдонларидаги ишчилар учун хавфсиз шароитларни яратиб беришга масъул эканликларини яна бир карра эслатиб ўтамиз. Зеро, меҳнат муҳофазасига амал қилиш билан содир бўлиши мумкин бўлган ҳар қандай бахтсиз ҳодисаларнинг олдини олиш мумкин, — дейилади вазирлик ахборотида.
Вазирлик, шунингдек, видеоролик тақдим этиб, унда қурилиш майдонидаги одатий тартиб ва қурилиш ишлари қай тарзда олиб борилиши кераклиги ҳақида маълумот берган.
Изоҳ (0)