Enter Engineering’нинг ўз вақтида маош ололмаётган ишчиларининг муаммоси вазирлик назоратига олинди

Фаолиятини 2012 йилда бошлаб, региондаги энг тараққий этаётган компаниялардан бири дея ўзига таъриф берган Enter Engineering компанияси минглаб ишчиларига ўз вақтида маош бермаётгани хабар берилганди. Мазкур муаммога Камбағалликни қисқартириш ва бандлик вазирлиги ҳам эътибор қаратди. 

Вазирлик ахборот хизмати раҳбари Фахриддин Ҳайитов “Дарё”нинг бу ҳақидаги сўровига жавобан ҳолат вазирликнинг меҳнат инспекцияси томонидан ўрганила бошланганини, ўрганиш натижалари ҳақида таҳририятга қўшимча ахборот берилишини билдирди.

“Дарё”га шикоят қилган компания ишчиларига кўра, минглаб ходимлар маош билан боғлиқ муаммога дуч келган.

Сентябрь ойидаги маошимизни ҳам олганимиз йўқ. Ҳали октябрь ойи турибди. Ойлик икки ярим, уч ойгача кечикяпти, — дейди шахси сир қолишини сўраган мурожаатчи. 

Мурожаатчининг айтишича, шикоятчи кимлиги аниқланса, раҳбарият уни ишдан бўшатади. Ва ходимнинг ишсиз қолиш эҳтимоли катта. Шу сабаб улар муаммони баралла айтишдан қўрқади.

Яна бир мурожаатчи ойлик маошига ишониб, автомобиль харид қилиш учун автокредит олганини, маоши кечикаётгани сабаб, кредитни ўз вақтида тўламагани учун иши судга ошганини айтганди.

Сентябрь ойи учун маошимнинг 30 фоизини пластикка ташлаб беришган, қолган 70 фоизини нақд шаклда олишим керак. Лекин мана ноябрь ойи якун бўляптики, сентябрь ойининг маошини ололганим йўқ. Ойликка қараб режа қиламиз, қўшнилардан қарз олавериб, қарзга ботиб кетдик, — деганди яна бир ишчи маошини ололмаётганини айтар экан.

Шахсини очиқласа, ишдан бўшатилишидан қўрққан яна бир ишчининг маълумот беришича, маошларнинг ўз вақтида берилмаслиги фақат ўзбекистонлик, оддий ишчиларга қилинаётган адолатсизлик ҳисобланади.

Бу ташкилот раҳбарлари ишчиларини ўйламайди. Қанча одам касал, оиласи бор, лекин пули йўқ. Менинг ҳам кредитларим бор. Тўлай олмаяпман. Чет элдан келган ишчиларга ўз вақтида ойлик беришади. Масалан, турклар, қозоқлар ва ҳиндлар ўз вақтида маошини олади. Уларда бундай муаммо йўқ. Биз ўзимизнинг юртимизда қул бўлдик. Сизлардан илтимос, шу масалада ёрдам беринг, — деган бу ҳақда гапирган ишчи.