Сурхондарёда Солиқ инспекцияси ходими билан жанжаллашган сотувчи аёллар жаримага тортилди. Бу ҳақда Сурхондарё вилояти солиқ бошқармаси матбуот хизмати хабар берди.
13 март куни Солиқ инспекцияси ходими ва бозорда савдо қилувчи аёл ўртасида жанжал бўлгани ҳақида видеолавҳалар тарқалди. Ўша куни ҳолат бўйича хизмат ўрганиши тайинлангани айтилганди.
15 март куни вилоят солиқ бошқармаси ҳолат бўйича маълумот берди. Таъкидланишича, 12 март куни Узун тумани солиқ инспекцияси ходимлари томонидан туманнинг “Баҳористон” маҳалласи ҳудудида савдо қилиш учун белгиланмаган жойларда ноқонуний фаолиятнинг олдини олишга қаратилган тадбирлар белгиланган тартибларга асосан ўтказилган.
Тадбир давомида мутасаддилар томонидан кўп маротаба огоҳлантиришларга қарамай, қонунга зид ҳамда антисанитария ҳолатида савдо фаолиятини давом эттириб келаётган фуқаролар Ш.Т. ҳамда С.Т. солиқ инспекцияси ходими Ф.Эргашевнинг ноқонуний савдо фаолиятини расмийлаштириш талабига қаршилик кўрсатиб, жанжал кўтаришган ва давлат хизматчисини обрўсизлантиришга ҳаракат қилишган.
Ҳолат юзасидан жиноят ишлари бўйича Узун тумани судининг қарорига асосан Ш.Т. ҳамда С.Т.га нисбатан маъмурий тартибда чора кўрилганлиги маълум бўлган.
Бундан ташқари, Сурхондарё вилояти солиқ ходимлари орасида йиғилиш ўтказилиб, ҳар бир ходим давлат хизматчисининг Ички меҳнат тартиб ва одоб-ахлоқ қоидалари талабларига риоя қилиши юзасидан огоҳлантирилган.
“Zo‘r TV” телеканалининг “Бу кун” информацион дастурида хабар берилишича, суд икки фуқарога нисбатан Маъмурий жавобгарлик тўғрисидаги кодекснинг 34-моддаси (бир неча ҳуқуқбузарликни содир этганлик учун маъмурий жазо қўлланиш)га асосан БҲМнинг 3 баравари – 1 млн 020 минг сўм миқдорида жарима жазосини тайинлаган.
Изоҳ (0)