Ижтимоий тармоқларда Қашқадарё вилоятидаги мактаблардан бирида ходимлар ўзини солиқ инспекциясидан келганини айтиб, ўқувчиларга солиқ тўлаш бўйича тушунтириш бергани акс этган видеолавҳалар тарқалган эди. Вилоят Солиқ бошқармаси ходимларга чора кўрилганини маълум қилди.
Нишон туманидаги 14-мактабда икки нафар фуқаро синфхонасига кириб, ўқувчиларга жисмоний шахслар томонидан тўланадиган мол-мулк ва ер солиқларининг тўлов муддатлари ҳақида тушунтириш бериб, эслатмалар тарқатган. Ҳолат бўйича Қашқадарё вилояти солиқ бошқармаси томонидан хизмат текшируви тайинланган эди. Хизмат текширувида қуйидагилар аниқланди.
4 сентябрь куни солиқ инспекциясининг Ишлаб чиқариш ва ёрдамчи ходимлар таркибидан Нурманов Рўзмамат Норқобилович ва Хазратқулов Бобур Асатуллаевичлар тумандаги 14-сонли ўрта мактаб бориб, 3-синф ўқувчиларига жисмоний шахслар томонидан тўланадиган мол-мулк ва ер солиқлари ҳақида эслатмаларни ота-оналарига етказиш учун тарқатган.
Инспекция раҳбарияти томонидан ушбу ходимларга эслатмани айнан мактаб ҳудудида тарқатиш ҳақида топшириқ берилмаган. Ходимлар мактаб ўқитувчиси билан келишиб, синф хонага кирган ҳолда ўқувчиларга эслатмаларни тарқатишган. Ҳолат синф раҳбари томонидан видео тасвирга олиниб, синф ўқувчилари ота-оналарининг Telegramдаги гуруҳига ташлаб юборилган. Натижада ушбу видео тасвир ижтимоий тармоқларга салбий талқинда тарқалиб кетган.
Ҳолат юзасидан Нишон тумани солиқ инспекцияси бошлиғининг биринчи ўринбосари И.Рахимқулов расмий огоҳлантириш берилди. Ходимлар Р.Нурманов ва Б.Хазратқуловларга йўл қўйган хатолари учун Меҳнат кодексига асосан “Ҳайфсан” интизомий жазо чораси қўлланилди.
Қашқадарё вилояти солиқ бошқармаси бошлиғи томонидан ўтказилган кенгайтирилган йиғилишда барча шаҳар ва туман солиқ инспекциялари бошлиқлари бу каби ҳолатларга йўл қўймасликлари юзасидан огоҳлантирилди.
Солиқ қўмитаси матбуот хизмати ҳолат юзасидан расмий муносабат билдирганди. Унда таъкидланишича, давлат солиқ хизмати органлари мактабда бўлган ҳолатни ноўрин хатти-ҳаракат деб ҳисоблайди ва кескин қоралайди.
Шунингдек, болалар омбудсмани бола манфаатлари бузилишига оид бу ҳолатни ўрганаётганини маълум қилганди.
“Мактаб ўқув жараёни иштирокчиси бўлмаган бегона шахсларнинг таълимга оид тартиб-қоидаларини қўпол равишда бузган ҳолда дарс жараёнига кириб бориши ва уни бузиши, болаларга қандайдир ноқонуний талаблар билан мурожаат қилиши — мутлақо йўл қўйиб бўлмайдиган ҳолат!
Болалар ўз ота-оналарининг солиққа оид мажбуриятлари учун жавобгар эмас, ҳеч бир ҳолатда уларни бу жараёнга жалб қилиш, огоҳлантириш мумкин эмас! Бу боланинг конституция ва қонун билан қўриқланадиган ҳуқуқ ва манфаатларига зиддир. Бундай ножўя ҳаракатларга йўл қўйган масъулларга тегишли тарзда чора кўрилиши шарт”, дейилади хабарда.
Изоҳ (0)