Россиянинг Санкт-Петербург шаҳрида ўзбекистонлик эркак 23-қаватдан тушиб кетди. Бу ҳақда 78.ru хабар берди.
Маълум қилинишича, ҳодиса 5 апрель куни Типанов кўчасида содир бўлган. Эркак бинонинг фасад конструкцияларини монтаж қилиш ишларини бажараётганда 23-қаватдан тушиб кетган. Марҳум 67 ёшли Ўзбекистон фуқароси ҳисобланади.
Монтажчи хавфли ишларни бажариш учун тегишли малакага эга бўлмагани айтилмоқда. Шунингдек, унда хавфсизлик камари бўлмаган. Ҳодиса тафсилотлари Тергов қўмитаси ва Давлат меҳнат инспекцияси томонидан аниқланмоқда.
Ўзбекистонликларнинг қурилишда ҳалок бўлишига оид сўнгги ҳолатлар
Юқоридаги ҳодиса Россияда қурилиш ва таъмирлаш вақти ўзбекистонликлар билан содир бўлган биринчи ҳолат эмас. Жумладан, 13 январь куни Санкт-Петербург шаҳри Приморский туманида ўзбекистонлик қурувчи 16-қаватдан тушиб кетганди. 30 ёшли ўзбекистонлик арматурачи ҳодиса оқибатида ҳалок бўлган.
26 ноябрь куни яна Санкт-Петербург шаҳри Муром кўчасида қурилиш вақти Ўзбекистон фуқароси томдан тушиб кетган. Марҳум ўзбекистонлик 47 ёшли муҳожир бўлиб, қурилиш компаниясига монтажчи бўлиб ишга кирган.
22 ноябрь куни Ленинград вилоятида 20 ёшли ўзбекистонлик ишчи қурилиш майдончасида вентиляция тешигига тушиб кетиб ҳалок бўлган. 3 ноябрь куни Ленинград вилоятида 19 ёшли ўзбекистонлик қурувчи тўққизинчи қаватдан тушиб вафот этганди.
28 февраль куни Санкт-Петербург шаҳридаги қурилиш майдончасида ўзбекистонлик мигрант ҳалок бўлди. Қурувчи экскаватор ишдан чиққач, уни ўзи таъмирлашга уринган. Бироқ экскаватор ковши тўғридан-тўғри унинг устига тушиб кетган. Ўзбекистонлик мигрант олган тан жароҳатлари туфайли воқеа жойида ҳалок бўлган. Унинг жасади ўликхонага юборилган, ҳуқуқ-тартибот идоралари текширув ўтказмоқда.
19 февраль куни Санкт-Петербург шаҳри Москва туманидаги қурилишда ўзбекистонлик 24 ёшли ишчи демонтаж қилаётганида 3,5 метрдан ортиқ баландликдан йиқилиб, вафот этди. Дастлабки маълумотларга кўра, бунга ишчининг хавфсизлик техникаси қоидаларини бузгани сабаб бўлган. Ҳолат юзасидан Тергов қўмитаси ва Давлат меҳнат инспекцияси томонидан текширувлар ташкил этилган
Изоҳ (0)