Солиқ қўмитаси раиси Шерзод Кудбиев раҳбарлигида ўтказилган кенгайтирилган Ҳайъат мажлисида хизмат вазифасини бажариш ҳамда солиқ маъмурчилигини таъминлашда жиддий хато ва камчиликларга йўл қўйган ходимлар фаолияти жиддий танқид қилиниб, ташкилий масалалар кўриб чиқилди.
Жумладан, берилган огоҳлантиришлар, профилактик суҳбатлар, кўрилган интизомий чоралардан хулоса чиқармасдан хато ва камчиликларга йўл қўйган ҳамда белгиланган самарадорлик кўрсаткичлари паст бўлган Қашқадарё, Андижон, Фарғона вилоятлари солиқ бошқармалари бошлиқлари ўринбосарлари, Пахтаобод, Избоскан, Шароф Рашидов ва Янги Наманган тумани солиқ инспекцияси бошлиқлари ҳамда 25 нафар масъул билан тузилган меҳнат шартномаси бекор қилинди.
Шунингдек, 150 нафарга яқин ходимга интизомий чоралар белгиланди, 15 нафар ходимнинг унвони бир поғонага пасайтирилди.
Йиғилишда ҳудудий солиқ органлари ва марказий аппарат раҳбар ҳамда масъуллларнинг ҳисоботлари эшитилиб, III чоракда солиқ тушумларини камида 20 фоизга ошириш, қўшимча манбаларни жалб этиш, солиқ тўловчиларга кўмаклашиш ва соҳани рақамлаштиришни изчил давом эттириш йўналишларида аниқ муддатли вазифалар белгилаб олинди, — дейилади хабарда.
Эслатиб ўтамиз, президент Шавкат Мирзиёев 2023 йил август бошида Андижон ва Сирдарё вилоятлари солиқ бошлиқлари ҳамда Солиқ қўмитасининг йирик солиқ тўловчилар билан ишлаш инспекцияси бошлиғи вазифаси бажарувчисини лавозимидан олганди. Улар бюджет тушумларини таъминлаш ва тадбиркорлар фаолиятини текширишда камчиликларга йўл қўйган.
Изоҳ (0)