Сирдарёда ёшлар учун мўлжалланган меҳнат гузари қийшиқ қурилаётгани аниқланди

Қурилиш ва уй-жой коммунал хўжалиги вазирлиги Сирдарё вилояти Гулистон шаҳрида қийшиқ қурилаётган объект бўйича маълумот берди.

Ижтимоий тармоқларда ёшлар учун мўлжалланган объектнинг бетон устунлари қийшиқ ҳолда кўтарилгани тасвирланган сурат тарқалди. Вазирликка кўра, мазкур объект Гулистон шаҳар “Намуна” МФЙ Бирлашган кўчасида жойлашган “Ёшлар меҳнат гузари” биноси.

Лойиҳачи — “Сирдарё вилояти лойиҳа ишлаб чиқариш бошқармаси” МЧЖ ҳисобланиб, объект 2022 йил 20 март куни №66-сонли рухсатнома билан “Шаффоф қурилиш” миллий ахборот тизими рўйхатидан ўтган, аммо “Қурилишда давлат назорати” миллий ахборот тизими орқали қайта рўйхатдан ўтказилмаган.

Ҳолат вилоят Қурилиш ва уй-жой коммунал хўжалиги соҳасида назорат қилиш инспекцияси ҳамда лойиҳа ташкилоти мутахассислари томонидан бориб ўрганилганда пудратчи томонидан қурилишда қуйидаги қоидабузарликларга йўл қўйилгани аниқланган:

• объектда малакали мутахассис (прораб) мавжуд эмас;
• яширин ишларни гувоҳлаш далолатномалари расмийлаштирилмаган;
• пойдевор ости ишлари учун ф-8 ва “акт разбивка” ҳужжатлари мавжуд эмас;
• пойдеворнинг бетон ишлари нотекис ва ташқи вертикал гидроизоляция ишлари сифатсиз бажарилган;
• бинонинг 1-қавати 3—4- ўқлари А-Б кесишмасида тасдиқланган лойиҳа ҳужжатларида қаватлараро зинапоя ва зинапоя майдончалари ўрни лойиҳа билан келишилмасдан ўзбошимчалик билан бинонинг конструктив ҳолатига ўзгартириш киритилган;
• 3-қаватдаги иккинчи ўқ Б-Б кесишмасидаги қуйилган темир-бетон устунларнинг ўзаро горизонтал ва вертикал ўқлардан 5-6 сантиметр қочган;
• бетон учун синов — лаборатория хулосалари пудратчи томонидан тақдим этилмаган.

Бугунги кунда мазкур объектда қурилиш ишлари тўхтатилиб, буюртмачига огоҳлантириш хати берилган ҳамда ушбу ноқонуний қурилмани бартараф этиш юзасидан судга даъво аризаси киритилган.

Аввалроқ Навоийда фуқаро “дом”га ўзи учун алоҳида лифт ўрнатаётгани аниқланганди. Мулкдорга кўп квартирали уйнинг умумий мулкидан фойдаланиш қоидалари, бунда аҳоли олдига қўйиладиган талаблар тушунтирилган ва ўзбошимчалик билан қурилган қурилмани бартараф этиш бўйича тегишли тартибда мажбурий кўрсатма берилган.