Колумбия президенти Густаво Петро бортида депортация қилинаётган колумбияликлар бўлган АҚШ самолётларига мамлакат ҳудудига қўнишни тақиқлади. АҚШ президенти Дональд Трамп бунга жавобан Колумбияга санкциялар киритди.
Маълум қилинишича, Колумбия ҳукумати бортида тахминан 160 нафар колумбиялик мигрант бўлган иккита АҚШ ҳарбий самолётини қабул қилишдан бош тортган. Депортация учун Колумбиянинг розилиги талаб қилинади.
АҚШ Колумбиядан келган муҳожирларга жиноятчилар каби муносабатда бўлмаслиги керак. Мен Шимолий Америка самолётларининг колумбиялик муҳожирлар билан бизнинг ҳудудимизга келишига рухсат бермайман. АҚШ уларни қабул қилишимиздан олдин муҳожирларга муносиб муносабатда бўлиш қоидаларини жорий этиши лозим, деган Колумбия президенти Петро.
Колумбияга қарши санкциялар
Шундан сўнг, Трамп Колумбиянинг барча товарларига 25 фоизлик бож жорий этишини эълон қилди ва уни 50 фоизгача ошириш билан таҳдид қилди. У Колумбия амалдорларининг АҚШга киришини тақиқлади, Колумбия ҳукумати аъзолари, уларнинг қариндошлари ва тарафдорларига қарши “виза санкциялари” жорий қилди.
Трамп Колумбиянинг барча фуқаролари учун чегарада кучайтирилган текширув бошланишини ва бу санкцияларнинг “фақат бошланиши” эканини айтди.
Колумбиянинг АҚШга жавоби
Петро санкцияларга жавобан Америка товарларига ҳам худди шундай божларни жорий этишга қарор қилди. У Колумбия депортация қилинган мигрантларни қабул қилишдан бош тортмагани, муаммо шундаки, мигрантлар “қўлида кишан ва ҳарбий самолётда” юборилганини айтди.
Эндиликда Колумбия ҳукумати АҚШдан депортация қилинган фуқароларини ватанига қайтаришда президент самолётидан фойдаланади.
Колумбия ҳукумати президент Густаво Петро раҳбарлигида бугун эрталаб мамлакатга депортация рейсларида келиши кутилаётган ватандошларнинг муносиб тарзда қайтишини таъминлаш мақсадида президент самолётини ажратиб берди. Ушбу қарор ҳукуматнинг муносиб шароитларни кафолатлаш бўйича зиммасига олган мажбуриятига жавобан қабул қилинди, дейилади президент матбуот хизмати хабарида.
Мигрантларни қабул қилишга розилик бергани сабабли АҚШ божлар ва санкцияларнинг бир қисмини бекор қилди.
Мексика ҳам мигрантлар бўлган самолётни қабул қилмаяпти
Аввалроқ АҚШ Ҳарбий-ҳаво кучларининг икки самолётини (тахминан 160 киши) Мексика қабул қилмаган. Шунингдек, депортация қилинганларни қабул қилишга розилик бермаган. Муҳожирлар бўлган учинчи самолёт умуман парвоз қилмаган. Бу парвозлар Трампнинг мигрантларга қарши курашиш бўйича кенг қамровли режасининг бир қисми ҳисобланади. Шу режа доирасида у аллақачон АҚШ жанубий чегарасида фавқулодда вазият режимини жорий этган ва у ерга қўшимча қўшин юбориши мумкин.
Трампнинг миграция сиёсати
Трамп 21 январь куни чегарадаги барча ноқонуний ўтиш жойлари ёпилишини таъкидлади. У АҚШ жанубий чегараси орқали ноқонуний мигрантларнинг киришини тақиқлаш тўғрисидаги фармонни имзолади. Бошпана излаш баҳонаси билан у ерда қолиш ҳуқуқини чеклади.
Президент Ички хавфсизлик вазирлиги, Адлия вазирлиги ва Давлат департаментига АҚШга жанубдан ноқонуний кираётганларни чиқариб юбориш чораларини кўришни топширди. Пентагон чегарага қўшимча 1,5 минг аскар ва вертолётлар юборилишини эълон қилди. Шунингдек, 5 мингдан ортиқ ноқонуний мигрантларни депортация қилиш учун авиация тақдим этилади, уларнинг оқими ва ноқонуний савдосини тўхтатиш учун вақтинчалик ва доимий тўсиқлар қурилади.
Мексика президенти АҚШга бориш учун унинг мамлакатига келаётган ноқонуний мигрантлар ўз ватанларига қайтариб юборилишини айтди. Мексика АҚШдан ноқонуний мигрантларни олиб келаётган ҳарбий транспорт самолётини қабул қилишдан бош тортди.
Изоҳ (0)