Муҳожирлар Америка жамиятини ривожлантириб ва ўзгартириб келган қатлам саналади. Турли маданиятлар ва билимлар таъсирлашиши натижасида АҚШ давлати бугунги кунда катта салоҳиятга эга мамлакатлардандир. Ушбу мақолада Американинг ривожланишига ўз ҳиссасини қўшган Голливуд юлдузларидан тортиб сиёсатчиларгача бўлган бир нечта шахсларни ёдга оламиз.
Арнольд Шварценеггер
Актёр ва бодибилдер Шварценеггер америкача орзуси ортидан ватани Австрияни ташлаб АҚШга кўчиб келган ва мақсадига эришган. Ҳозирда у Голливуд юлдузи ва етук сиёсатчи сифатида бутун дунёга танилган.
Натали Портман
Кино актриса асли Исроилнинг Қуддус шаҳрида таваллуд топган. Натали Портман икки давлат — АҚШ ва Исроил фуқаролигига эгадир.
Энтони Ҳопкинс
“Қўзилар сукунати” ва “Ганнибал” фильмлари юлдузи Ҳопкинс аслида Уэлсликдир. Унинг Голливуддаги карьераси ажойиб тарзда ўтган. Актёр 2000 йилда АҚШ фуқаролигини олган ва кўпроқ вақтини Калифорниянинг Maлибу шаҳрида ўтказади.
Алберт Эйнштейн
Алберт Эйнштейн, эҳтимол, Қўшма Штатларга кўчиб келган энг обрўли шахслардан бири. Машҳур физик олим Германиянинг Ульм шаҳрида туғилган. У Принстон университетида ишлаган ва 1940 йилда Америка фуқаролигини олган.
Эмили Блант
Машҳур британиялик актриса 2008 йилда АҚШга кўчиб келган ва 2015 йилда давлат фуқаролигини олган. У Нью-Йорк ва баъзан Лондонда яшайди.
Сергей Брин
Асли Москвадан (Россия) бўлган Google асосчиларидан бири Сергей Михайлович 90 йилларнинг охирида Ларри Пейж билан биргаликда Microsoft ва Apple каби компаниялардан заиф бўлмаган Google’ни яратди ва рақамли иқтисодиётнинг пойдеворини қўйди. Шунингдек, у дунёдаги энг бой одамлардан биридир.
Пирс Броснан
1995–2002 йиллар оралиғида Жеймс Бонд ҳақидаги 4 та фильмда суратга тушган Пирс Броснан 2004 йилда АҚШ фуқаролигини олган. Унинг асл ватани Ирландиядир.
Камила Кабелло
Машҳур қўшиқчи кубалик ва мексикаликлар оиласида вояга етган. Олти ёшида у онаси билан АҚШ чегарасини босиб ўтган ва 2008 йилда фуқароликни олган. “Мени ота-онам бу ерга олиб келганда уларнинг чўнтагида умиддан ўзга ҳеч нарса йўқ эди”, — дейди хонанда.
Мадлен Олбрайт
1997 йил 23 январь куни Мадлен Олбрайт АҚШ давлат котиби лавозимини эгаллаган тарихдаги биринчи аёлга айланган эди. У ўз вақтида Чехословакияда шу каби нуфузли дипломатик лавозимда фаолият юритган мигрант — Йозеф Кербелнинг қизи ҳисобланади. У Прага шаҳрида туғилган ва 1948 йилда Европадан Америкага кўчиб ўтган.
Брюс Уиллис
Голливуднинг энг кўп маош олувчи актёрларидан бири ва “Ўтда ёнмас” фильми юлдузи Германияда туғилган. Унинг отаси Америка ҳарбий базасида хизмат қилганлиги учун 1957 йилда Брюс ота-онаси ва оила аъзолари билан Нью-Жерси штатига кўчиб келган.
Никола Teсла
Машҳур ихтирочи 1856 йилда ҳозирги Хорватия ҳудудидаги, ўша пайтда Австрия империясининг бир қисми бўлган Смиляне қишлоғида туғилган. 1884 йил июнь ойида Teслa Нью-Йоркка кўчиб ўтди ва 7 йил ўтгач АҚШ фуқаролигини олади.
Шарлиз Терон
Актриса Жанубий Африкада туғилган бўлиб, моделлик фаолияти бўйича АҚШга келган. Кейин эса Голливудда карьерасини давом эттириш учун Лос-Анжелесга кўчган ва 2007 йилда АҚШ фуқаролигини олган.
Сальма Ҳайек
Актриса Сальма Ҳайек Мексиканинг Коацакоалькос шаҳридан бўлиб, унинг “Умрбоқийлар”, “Тереза”, “Қурбон бўлган муҳаббат”, “Фрида” ва бошқа лойиҳалари дунё бўйлаб машҳурликка эришган.
Эндрю Карнеги
1835 йил 25 ноябрда Шотландиянинг Дан-Фермлин қишлоғида туғилган. Ишчилар синфидан келиб чиққан Карнеги Америкадаги энг бой ва саховатли хайриячилардан бирига айланган.
Кристиана Аманпур
Машҳур журналист ва телебошловчи коллежда ўқиш учун Қўшма штатларга кўчиб ўтган. У Буюк Британияда туғилган. Отаси форс ва онаси инглиз миллатига мансуб. Кристиана Эронда ҳам таҳсил олган.
Изоҳ (0)