2024 йил апрель–июнь ойларида Ўзбекистондаги бўш иш ўринлари ойлик ўртача 35,7 мингтани ташкил этди. Бу ҳақда Марказий банк эълон қилган меҳнат бозори шарҳида келтирилган.
Қайд этилишича, жорий йил II чорагида бўш иш ўринлари сони I чорак кўрсаткичларига нисбатан 3 фоизга кам бўлган. Июнь ойида бўш иш ўринлари сонининг камайиши мавсумий, жумладан, ўқув йилининг тугаши ва таътил мавсумининг бошланиши билан боғлиқ бўлиши мумкин.
“Бундан ташқари, июнь ойида ўтган ойлардан қолган бўш иш ўринлари сонининг камайиши бўш иш ўринлари нисбатан тез тўлдирилгани ва янги вакансияларнинг эълон қилинмаганидан далолат беради”, дейилади шарҳда.
Марказий банк аҳоли иш қидириши бўйича онлайн кузатиш олиб борган. Натижаларга кўра, II чоракда иш қидириш учун очиқ веб–ресурсларга ташриф буюрувчилар билан бирга кўришлар сони ҳам пасайган.
“Сўнгги ойларда иш излаш бўйича сўровлар сони қисқаришда давом этди. Июнь ойида иш қидириш учун мўлжалланган веб–сайтларга ташриф буюрувчилар сони қарийб 360 минг кишини ташкил этиб, йил боши ва ўтган йилнинг мос даврига нисбатан ўртача кўрсаткичлардан бир оз пастроқ шаклланди”, дея қайд этган регулятор.
Апрель–июнь ойларида республикада якка тартибдаги тадбиркорлар сони I чоракка нисбатан 23 мингтага (8,8 фоиз) ошиб, 287 минг кишини ташкил этган. Юқори ўсиш маиший хизмат кўрсатиш соҳасида (+21,3 фоиз) қайд этилган бўлиб, чакана савдо соҳасида тадбиркорлар сонининг ўсиши бир оз секинлашган.
Ўз-ўзини банд қилганлар сони барқарор ўсишда давом этмоқда ва июнь ойи охирига 3,55 миллион кишига етган (I чоракдагидан 730 минг кишига кўп). Уларнинг учдан икки қисми маиший хизмат (41 фоиз) ва қишлоқ хўжалиги (26 фоиз) соҳаларида фаолият юритиб, апрель–июнь ойларида умумий ўсиши 26,6 фоизни ташкил этди. Автотранспорт воситаларини бошқариш соҳасида ўз–ўзини банд қилганлар сони 530 минг кишигача (+36 минг киши) ошди.
Иш ҳақи динамикаси
Марказий банк таҳлилига кўра, охирги уч ойда мамлакатда иш ҳақининг йиллик номинал ўсиш суръати 17,4 фоизгача, реал ўсиш суръати 7,7 фоизгача секинлашди.
Бироқ, жорий йил кўрсаткичларида ўтган йилги индексация таъсирининг сақланиб қолиши ва ўртача йиллик инфляциянинг нисбатан пастлиги туфайли иш ҳақининг ўсиш суръати бир оз юқорилигича қолмоқда.
“Хизмат кўрсатиш соҳаси, хусусан, савдо (+24,6 фоиз), транспорт (+20,6 фоиз), алоқа ва ахборотлаштириш (+23,2 фоиз) соҳаларида иш ҳақи жадал ўсишда давом этмоқда. Қурилиш соҳасида иш ҳақи ўсиши ўтган йилнинг иккинчи ярмидан секинлашиб бормоқда. Бу соҳада ишчи кучи таклифининг ошиши асосий омиллардан бўлиши мумкин. Бошқа тармоқларда (саноат, таълим, соғлиқни сақлаш) иш ҳақининг ўсиши ўртача кўрсаткичлар доирасида қолмоқда”, дейилади таҳлилда.
Трансчегаравий пул ўтказмалари динамикаси ва меҳнат мигрантлари оқими
Жорий йилнинг биринчи яримида мамлакатга пул ўтказмаларининг умумий ҳажми 6,5 миллиард долларни ташкил этиб, ўтган йилнинг мос даврига нисбатан 25 фоизга ошди.
“Пул ўтказмаларининг сезиларли ўсиши анъанавий мигрант мамлакатлари валюталарининг нисбий барқарорлиги, иш ҳақининг ўсиши, аксарият қабул қилувчи мамлакатларда иқтисодий фаолликнинг юқорилиги, ишчи кучига доимий талаб ва давом этаётган географик диверсификация билан таъминланмоқда”, дея қайд этган Марказий банк.
Шарҳда маълум қилинишича, меҳнат ресурсларига ташқи талаб ортиб бораётган бўлиб, апрель–июнь ойларида 3,6 мингта янги бўш хорижий иш ўринлари эълон қилинган.
Бундан ташқари, Европа мамлакатлари, хусусан, Германия ва Швейцариядан маълум малакага эга ишчилар учун бўш иш ўринлари таклифи кенгаймоқда.
Меҳнат миграцияси географиясининг кенгайиши ва ишчи кучининг халқаро диверсификацияси натижасида АҚШ (+43 фоиз), Германия (+64 фоиз), Польша (+93 фоиз) ва Жанубий Кореядан (+90 фоиз) пул ўтказмалари ҳажми сезиларли ошди.
Изоҳ (0)