АҚШ жанубий чегарасидаги вазият миллий хавфсизликка таҳдид солмоқда, чунки 2024 йил бошидан бери чегарада муҳожирларни қўлга олишлар сони 1 миллионга яқинлашди. Бу ҳақда АҚШ чегара хизмати раҳбари Жейсон Оуэнс CBS News телеканалига берган интервьюсида маълум қилди.
Бу миллий хавфсизликка таҳдид. Чегара хавфсизлиги миллий хавфсизликнинг муҳим қисмидир. Мамлакатимизга кимлар кириб келаётганини билмасак, уларнинг ниятларини билмаймиз, — деди АҚШ чегара хизмати раҳбари.
Оуэнс сўнгги олти ой ичида Чегара хизмати АҚШ—Мексика чегарасида 1 миллионга яқин муҳожирнинг қўлга олинишини қайд этгани ва бу рақам сентябрга келиб икки баравар ошиши мумкинлигини таъкидлаган.
Бу жуда катта рақам, лекин мени кўпроқ 140 000 нафар бекиниб олганлар ташвишга солади , — дея қўшимча қилган Оуэнс.
2022 ва 2023 йилларда АҚШ чегара хизмати жанубий чегарани ноқонуний кесиб ўтган 2 миллиондан ортиқ муҳожирларнинг ҳибсга олингани ҳақида хабар берган, бу тарихдаги энг юқори кўрсаткичдир.
2023 йилнинг май ойида мамлакат депортация бўйича 42-модда деб аталадиган махсус режимни қўллашни тўхтатган. Унга кўра, муҳожирларга COVID-19 тарқалиши хавфи туфайли бошпана бериш рад этилиши мумкин бўлган. Амалдаги президент Жо Байден маъмурияти бошпана олиш ҳуқуқига эга бўлмаганларни депортация қилиш талабларини жорий этишига қарамай муҳожирлар оқими камаймаган.
Изоҳ (0)