Россиянинг Украинага қарши ҳарбий ҳаракатларида қатнашган 52 ёшли Ўзбекистон фуқароси озодлиги 4 йилга чекланди. “Дарё” тегишли суд ҳукми билан танишди.
Унга кўра, 1973 йилда Самарқанд вилояти Пастдарғом туманида туғилган Т.Р. 2021 йил май ойида ишлаш учун Россиянинг Санкт Петербург шаҳрига борган ва қурилиш ишларида меҳнат қилган. 2024 йил январида у Россия ҳуқуқни муҳофаза қилувчи органлари томонидан ушланиб, мамлакатда яшаш қоидаларини бузганликда айбланган ва 2024 йил 22 мартга қадар ҳибсда сақланган.
Жазони ўташ давомида милиция ходимлари у билан бир неча марта суҳбат ўтказиб, катта миқдорда маош эвазига Россия қуролли кучларига ҳарбий хизматга кириб, Украинага қарши ҳарбий ҳаракатларда иштирок этишини, бунинг эвазига Россия фуқаролигини беришни таклиф қилишган. Мажбурликдан бу таклифга рози бўлиб, бир йиллик ҳарбий хизмат шартномасига имзо чеккан.
Т.Р. Ленинград вилоятининг Viboрг тумани, Каменка посёлкасида жойлашган жанг майдонида Украинага қарши ҳаракатларда фаол иштирок этган. Ҳарбий истеҳкомлар (блиндаж) қуриш ишларига жалб қилинган.
Уни қорин оғриғи безовта қилиб тургани сабабли 2024 йил октябрида ҳарбий қисм тиббий бўлимига даволаниш учун ётқизилган, сўнг Белгороддаги ҳарбий поликлиникага олиб борилган. У ерда ҳам даволай олишмаганидан кейин Санкт Петербургдаги ҳарбий поликлиникага юборилган. Декабрь ўрталаригача тиббий текширувлардан ўтказилиб, кейин даволаниш учун Краснодар вилоятидаги ҳарбий санаторийга юборишган. Ўша жойда 2025 йил январгача даволанган.
2025 йил 10 январь куни у “Ғишткўприк” чегара назорат-ўтказиш пункти орқали Ўзбекистонга қайтиб келган.
Суд Т.Р.ни Жиноят кодексининг 154-моддаси 1-қисмида (ёлланиш) назарда тутилган жиноятни содир этганликда айбли деб топилди ва 4 йил озодликни чеклаш жазоси тайинланди. Жазо тайинлашда айбига тўлиқ иқрорлиги, қилмишидан чин дилдан пушаймонлиги, илгари судланмаганини инобатга олинди. Жазони ўташ даврида у яшаш жойини фақат ишга бориш ва қайтиш вақтларида тарк этиш ҳуқуқига эга бўлади.
2025 йил январида Россия армиясида Украинага қарши жанг қилган ўзбекистонлик эркак озодлиги 4 йил-у 2 ойга чекланганди.
Изоҳ (0)