Rossiyaning Ukrainaga qarshi harbiy harakatlarida qatnashgan 52 yoshli O‘zbekiston fuqarosi ozodligi 4 yilga cheklandi. “Daryo” tegishli sud hukmi bilan tanishdi.
Unga ko‘ra, 1973-yilda Samarqand viloyati Pastdarg‘om tumanida tug‘ilgan T.R. 2021-yil may oyida ishlash uchun Rossiyaning Sankt Peterburg shahriga borgan va qurilish ishlarida mehnat qilgan. 2024-yil yanvarida u Rossiya huquqni muhofaza qiluvchi organlari tomonidan ushlanib, mamlakatda yashash qoidalarini buzganlikda ayblangan va 2024-yil 22-martga qadar hibsda saqlangan.
Jazoni o‘tash davomida militsiya xodimlari u bilan bir necha marta suhbat o‘tkazib, katta miqdorda maosh evaziga Rossiya qurolli kuchlariga harbiy xizmatga kirib, Ukrainaga qarshi harbiy harakatlarda ishtirok etishini, buning evaziga Rossiya fuqaroligini berishni taklif qilishgan. Majburlikdan bu taklifga rozi bo‘lib, bir yillik harbiy xizmat shartnomasiga imzo chekkan.
T.R. Leningrad viloyatining Viborg tumani, Kamenka posyolkasida joylashgan jang maydonida Ukrainaga qarshi harakatlarda faol ishtirok etgan. Harbiy istehkomlar (blindaj) qurish ishlariga jalb qilingan.
Uni qorin og‘rig‘i bezovta qilib turgani sababli 2024-yil oktyabrida harbiy qism tibbiy bo‘limiga davolanish uchun yotqizilgan, so‘ng Belgoroddagi harbiy poliklinikaga olib borilgan. U yerda ham davolay olishmaganidan keyin Sankt Peterburgdagi harbiy poliklinikaga yuborilgan. Dekabr o‘rtalarigacha tibbiy tekshiruvlardan o‘tkazilib, keyin davolanish uchun Krasnodar viloyatidagi harbiy sanatoriyga yuborishgan. O‘sha joyda 2025-yil yanvargacha davolangan.
2025-yil 10-yanvar kuni u “G‘ishtko‘prik” chegara nazorat-o‘tkazish punkti orqali O‘zbekistonga qaytib kelgan.
Sud T.R.ni Jinoyat kodeksining 154-moddasi 1-qismida (yollanish) nazarda tutilgan jinoyatni sodir etganlikda aybli deb topildi va 4 yil ozodlikni cheklash jazosi tayinlandi. Jazo tayinlashda aybiga to‘liq iqrorligi, qilmishidan chin dildan pushaymonligi, ilgari sudlanmaganini inobatga olindi. Jazoni o‘tash davrida u yashash joyini faqat ishga borish va qaytish vaqtlarida tark etish huquqiga ega bo‘ladi.
2025-yil yanvarida Rossiya armiyasida Ukrainaga qarshi jang qilgan o‘zbekistonlik erkak ozodligi 4 yil-u 2 oyga cheklangandi.
Izoh (0)