Москвадаги автобуслардан ўзбек, қирғиз ва тожик тилларида Россия фуқаролиги эвазига армияда хизмат қилиш ҳақидаги мурожаатлар ёзилган чақирувлар олиб ташланди. Бу ҳақда «ТАСС» хабар берди.
Москвадаги автобуслар ва электробуслар учун масъул бўлган «Мосгортранс» давлат унитар корхонаси эълонлар ҳақиқатан ҳам кўрсатилганини тасдиқлади, аммо аллақачон олиб ташланганини қўшимча қилди. Мурожаатлар «Сахарова» миграция маркази раҳбариятининг илтимосига кўра МЦ1, МЦ2 ва МЦ3 йўналишларидаги автобусларда икки ой муддатга жойлаштирилган.
«Ҳозирда хабарлар олиб ташланди», — дейилади «Мосгортранс» матбуот хизмати хабарида.
Ўз навбатида, Ўзбекистон Ташқи меҳнат миграцияси агентлиги Россияда вақтинча меҳнат фаолиятини амалга ошираётган Ўзбекистон фуқароларини огоҳликка чақирганди.
«Россия Федерацияси ҳудудида вақтинча меҳнат фаолиятини амалга ошираётган Ўзбекистон фуқароларидан Россия ва Украина ўртасидаги зиддиятли ҳудудларга жалб қилиш ҳақидаги даъватларга эргашмасликни, зиддиятли ҳудудларга бормасликни ва ҳарбий ҳаракатларда иштирок этмасликни сўраймиз», — дейилади агентлик хабарида.
Эслатиб ўтамиз, Ўзбекистон Жиноят кодексининг 154-1-моддасида чет давлатларнинг ҳарбий хизматига, хавфсизлик, полиция, ҳарбий адлия органлари ёки шунга ўхшаш бошқа органларига хизматга ёлланиш 3 йилдан 5 йилгача озодликни чеклаш ёхуд 3 йилдан 5 йилгача озодликдан маҳрум қилиш билан жазоланиши кўзда тутилган.
Изоҳ (0)