Украинадаги уруш доирасида Россия чет эл фуқароларини шартнома бўйича ҳарбий хизмат ўташини рағбатлантириб, уларга соддалаштирилган тартибда Россия фуқаролигини олиш имкониятини бермоқда. Бу ҳақда Россия Тергов қўмитаси раҳбари Александр Бастрикин «Российская газета»га берган интервьюсида маълум қилди.
Унинг сўзларига кўра, Россия фуқаролигини олиш орқали муҳожирлар нафақат ҳуқуқларни, балки амалдаги қонунчиликда белгиланган мажбуриятларни ҳам олади. Улардан бири Россия Қуролли кучлари талабларига мувофиқ ҳарбий хизматни ўташдир.
Бастрикин статистик маълумотларга тўхталиб, чет элликлар ҳарбий хизматни четлаб ўтиб, оммавий равишда Россия фуқаролигини олаётганини айтди. Охирги беш йил ичида Марказий Осиё ва Кавказ давлатларидан келган миллиондан ортиқ киши, жумладан, Тожикистон, Ўзбекистон ва Қирғизистондан 550 минг киши Россия фуқаролигини олганини қайд этди.
«2022 йилнинг биринчи ярмида юқорида кўрсатилган давлатларнинг 60 мингдан ортиқ вояга етган фуқаролари Россия фуқаролигини олди. Шунинг учун улар мамлакатни ҳимоя қилишнинг конституциявий мажбуриятини ҳам олган. Шу муносабат билан, фуқароликка қабул қилинган шахсларнинг махсус ҳарбий операция вазифаларини амалга оширишда иштирок этиши масаласини кўриб чиқиш мақсадга мувофиқдир», — деди Александр Бастрикин.
Эслатиб ўтамиз, Ўзбекистон Жиноят кодексининг 154-1-моддасида чет давлатларнинг ҳарбий хизматига, хавфсизлик, полиция, ҳарбий адлия органлари ёки шунга ўхшаш бошқа органларига хизматга ёлланиш 3 йилдан 5 йилгача озодликни чеклаш ёхуд 3 йилдан 5 йилгача озодликдан маҳрум қилиш билан жазоланиши кўзда тутилган.
Мавзуга доир: Россиядаги ўзбекистонлик маҳбуслар Украинадаги урушга ёлланаётгани ҳақида маълумот берилди
Изоҳ (0)