«Ангарлик маньяк»: 80 дан ортиқ аёлни ўлдирган маҳбус Украинадаги урушга юбориладими?

Россияда 80 дан ортиқ қотиллик учун умрбодга қамалган «ангарлик маньяк» Михаил Попков илтимосига қарамай Украинадаги урушга юборилмайди. Бу ҳақда ҳуқуқ-тартибот идораларидаги манбага таяниб, Life.ru хабар берди.

Нашр суҳбатдошига кўра, «ангарлик маньяк» аслида ҳеч қаерга кетмоқчи эмас, чунки у хавфсиз ҳаёт ва журналистлар билан суҳбат орқали пул топишдан мамнун. Попковнинг урушга бормоқчилиги ҳақидаги баёноти эса «ўзини эслатиш ва ватанпарвардек кўрсатиш»га қаратилган.

Попков яқинда Ангарскда 1996-1997 йилларда яна икки аёлни ўлдирганига иқрор бўлиши уни Украинадаги урушга ёлланмаслиги учун асосли сабаблардан бири бўлишини билади. Айни пайтда у Иркутскдаги тергов изоляторига ўтказилган, унга нисбатан янги жиноят иши қўзғатилиши ва кейинги тергов ҳаракатлари бўлиши кутилмоқда.

Эслатиб ўтамиз, 81 нафар аёлни ўлдиргани учун икки марта умрбод қамоқ жазосига ҳукм қилинган Михаил Попков Украинадаги урушда иштирок этмоқчилигини айтди. У «Вести Иркутск» газетасига ёзган шарҳида «армияга боришни орзу қилишини» айтган. Шу билан бирга, Попков қишда совуқда урушга боришни хоҳламаслигини билдирган. У урушда қатнашиш учун керакли бўлган кўникмаларни тез ўрганишини таъкидлаган.