Россия Мариуполга келган ўзбек қурувчиларини паспортларини олиб қўйиб, фронтга жўнатгани айтилмоқда 

Россия Донецк вилоятида Ўзбекистондан келган қурувчиларнинг паспортларини олиб қўйиб, уларни “кўнгилли” сифатида урушга юборди. Украина Қуролли кучлари бош штаби бу ҳақда маълумот берди.

Маълум қилинишича, ўзбекистонликлар Мариуполда қурилиш ишларини олиб бориши керак эди. Россия қўшинларининг Донецк вилоятининг вақтинча босиб олинган Горловка шаҳрида жойлашган бўлинмаларида Ўзбекистон фуқаролари борлиги қайд этилган.

“Ушбу шахслар Мариупол шаҳрига қурилиш ишларини олиб бориш учун келган. Етиб келгач, паспортлари олиб қўйилиб, кўнгиллилар сифатида Россия Қуролли кучлари сафига сафарбар қилинган”, — дейилади Бош штаб хабарида.

Аввалроқ Россиянинг Волгоград шаҳридаги автобусларда Россия армиясига хизматга қабул қилиш тўғрисида ўзбек тилидаги эълонлар пайдо бўлганди. Ойига 200 минг рубль (тахминан икки минг доллардан ошади) ваъда қилинган даромаддан ташқари, хизматга боришни истаганлар Россия фуқаролигини соддалаштирилган тартибда олиши эслатиб ўтилади. 

Бундай эълонлар хорижлик фуқаролар учун мўлжаллангани ва тожик, қозоқ тилларида ҳам чоп этилиши таъкидланган.

Ўзбекистон фуқароларига чет давлатларининг ҳарбий хизматига ёлланиш қонунан тақиқланади!

Ўзбекистон фуқаролари чет давлатларнинг (шу жумладан, Россиянинг) ҳарбий хизматига, хавфсизлик, полиция, ҳарбий адлия органлари ёки шунга ўхшаш бошқа органларига хизматга кириш, ёллангани учун Ўзбекистон Жиноят кодексининг 154,1-моддасига кўра 3 йилдан 5 йилгача озодликни чеклаш ёки озодликдан маҳрум қилиш билан жазоланади.

Бундан ташқари, ёлланиш учун ҳам Жиноят кодексининг 154-моддасида жавобгарлик белгиланган. Унга кўра, ёлланма аскар бўлганлар 7 йилдан 12 йилгача озодликдан маҳрум этилади. Бундай жавобгарлик бошқа давлатлар (хусусан, қўшни давлатнинг) Жиноят кодексларида ҳам белгиланган.

Масалан, Тожикистон Жиноят кодексининг 401,1-моддасига кўра 12 йилдан 20 йилгача қамоқ жазоси, Қирғизистон Жиноят кодексининг 416-моддасига кўра 7 йилдан 15 йилгача қамоқ жазоси, Қозоғистон Жиноят кодексининг 162,1-моддасига кўра эса 7 йилгача озодликдан маҳрум этиш жазоси назарда тутилган. Ўзбекистон фуқаролари фақат Ўзбекистон армиясида хизмат ўташлари мумкин.