Украинанинг Тошкентдаги элчихонаси Ўзбекистон фуқароларига Россиянинг ушбу давлатга қарши урушида қатнашмаслик ва Украинанинг вақтинча босиб олинган ҳудудларига бормасликка чақирди.
Элчихона мурожаатида айтилишича, Россия Украинанинг вақтинча босиб олинган ҳудудларида олиб борилаётган жанговар ҳаракатлар чоғида шахсий таркибининг катта йўқотишлари туфайли Украинага қарши урушда қатнашиш учун хорижий фуқароларни жалб қилишга уринмоқда.
Украина Қуролли кучлари Бош штаби маълумотларига кўра, ишғол қилинган Донецк вилояти Горловка шаҳрида жойлашган Россия босқинчи кучларининг бўлинмаларида Ўзбекистон фуқаролари борлиги аниқланган. Ушбу шахслар Украина чегарасини ноқонуний кесиб ўтиб, қурилиш ишларини олиб бориш учун келган. Мариуполга етиб келганидан сўнг уларнинг паспортлари олиб қўйилган ва бу фуқаролар кўнгиллилар сифатида сафарбар қилинган.
Элчихона Ўзбекистон фуқаролари эътиборини Россиянинг Украинага қарши урушида иштирок этишига йўл қўйилмаслигига қаратди: “Украинага қарши қуролли тажовузда қатнашган чет эл фуқаролари Украина миллий қонунчилиги ва халқаро ҳуқуқ нормаларига мувофиқ жиноий жавобгарликка тортилади”.
Аввалроқ Россиянинг Волгоград шаҳридаги автобусларда Россия армиясига хизматга қабул қилиш тўғрисида ўзбек тилидаги эълонлар пайдо бўлганди. Ойига 200 минг рубль (тахминан икки минг доллардан ошади) ваъда қилинган даромаддан ташқари, хизматга боришни истаганлар Россия фуқаролигини соддалаштирилган тартибда олиши эслатиб ўтилади. Бундай эълонлар хорижлик фуқаролар учун мўлжаллангани ва тожик, қозоқ тилларида ҳам чоп этилиши таъкидланган.
Ўзбекистон фуқароларига чет давлатларининг ҳарбий хизматига ёлланиш қонунан тақиқланади!
Ўзбекистон фуқаролари чет давлатларнинг (шу жумладан, Россиянинг) ҳарбий хизматига, хавфсизлик, полиция, ҳарбий адлия ёки шунга ўхшаш бошқа органларига хизматга кириш, ёллангани учун Ўзбекистон Жиноят кодексининг 154,1-моддасига кўра 3 йилдан 5 йилгача озодликни чеклаш ёки озодликдан маҳрум қилиш билан жазоланади.
Бундан ташқари, ёлланиш учун ҳам Жиноят кодексининг 154-моддасида жавобгарлик белгиланган. Унга кўра, ёлланма аскар бўлганлар 7 йилдан 12 йилгача озодликдан маҳрум этилади. Бундай жавобгарлик бошқа давлатлар (хусусан, қўшни давлатнинг) Жиноят кодексларида ҳам белгиланган.
Масалан, Тожикистон Жиноят кодексининг 401,1-моддасига кўра 12 йилдан 20 йилгача қамоқ жазоси, Қирғизистон Жиноят кодексининг 416-моддасига кўра 7 йилдан 15 йилгача қамоқ жазоси, Қозоғистон Жиноят кодексининг 162,1-моддасига кўра эса 7 йилгача озодликдан маҳрум этиш жазоси назарда тутилган. Ўзбекистон фуқаролари фақат Ўзбекистон армиясида хизмат ўташлари мумкин.
Изоҳ (0)