Украинага қарши урушда қатнашган қозоғистонликка ҳукм ўқилди

Қозоғистонда “Вагнер” жангчиси Украинадаги урушда қатнашгани учун олти йилу саккиз ойга қамоқ жазосига ҳукм қилинди. Бу ҳақда “РБК” хабар берди.

Айбланувчи Алексей Шомполов Красноярск ўлкасидан, лекин Қозоғистон фуқаролигига эга. У Жиноят кодексининг 170-моддаси 3-қисми (конституциявий тузумни ағдариш ва бузишга ёки давлатнинг ҳудудий яхлитлигини бузишга қаратилган қуролли конфликтда, ҳарбий ва бошқа зўравонлик ҳаракатларига ёлланиш) билан айбдор деб топилди.

Суд қарорига кўра, Шомполов март ойида “BKонтакте” орқали Қарағандада бўлганида, пул эвазига “Вагнер” сафида Украинага қарши урушишга рози бўлган. Шундан сўнг у Россияга тайёргарлик кўриш учун кетган. Апрель ойининг охирида у Бахмутга (Артемовск) юборилган, у ерда жангларда қатнашган ва яраланган.

Эркак айбини тан олган, суд унинг иқрорини инобатга олган. “Вагнер”дан олинган маблағлар мусодара қилинган. “Вагнер”да унга Зубрак тахаллуси берилган. У 24 апрелдан 13 майгача артиллерия гуруҳи таркибида Бахмут яқинида жанг қилган, бироқ ўқ отиш вақтида тирсагидан яраланган ва Луганскдаги касалхонага етказилган. У “Вагнердан” 235 минг рубль (тахминан 2 минг 654 доллар) олган.