Россия қўшни давлатлар фуқароларини ва Марказий Осиёдан келган муҳожирларни Украинага қарши урушда қатнашиш учун жалб қилмоқда. Бу ҳақда Буюк Британия Мудофаа вазирлиги ҳисоботида келтирилди.
2023 йил июнь ойи ҳолатига кўра, Россия қўшни давлатлар фуқароларини Украинадаги жанговар ҳаракатларга ёллаш тўғрисида эълонлар билан мурожаат қилган.
Жумладан, Арманистон ва Қозоғистонда интернетда урушга ёлланиш бўйича реклама жойлаштирилиб, унда фуқароларга дастлабки тўлов сифатида 5140 доллар ва 1973 доллардан маош берилиши ёзилган. Россия Қозоғистоннинг шимолидаги Костанай вилоятидаги этник русларга ҳам мурожаат қилгани айтилмоқда.
Бундан ташқари, май ойидан бери Россия Марказий Осиёдан келган мигрантларни урушга жалб қилишга уринаётгани келтирилган. Уларга тезлаштирилган тарзда Россия фуқаролигини олиш ва 4160 доллар ва ундан ортиқ маош ваъда қилинган.
Британия разведкаси Донецк вилоятининг вақтинча босиб олинган Мариупол шаҳрида рус ҳарбийлари ўзбек муҳожирларининг паспортларини олиб қўйгани, оқибатда улар Россия Қуролли кучлари сафига қўшилишга мажбур бўлганини ёзган.
Россияда Марказий Осиёдан олти миллионга яқин муҳожир истиқомат қилади, разведка маълумотларига кўра, Кремль уларни потенциал ёлланганлар деб билади.
Шу йўл билан Россия 2024 йилда бўлиб ўтадиган президентлик сайловлари олдидан кейинги ички сафарбарликдан қочишга ҳаракат қилмоқда.
Таъкидланишича, чет элликларнинг бундай “эксплуатацияси” фронтда катта йўқотишларга қарамай, рус армияси учун қўшимча ресурс беради.
Изоҳ (0)