Украинадаги урушда қатнашгани учун 10 йилга қамалган Қирғизистон фуқароси Асқар Кубаничбек ўғли Россиядан ёрдам сўради. Бу ҳақда Russian Today хабар берди.
Кубаничбек ўғли Украинадаги урушда рус қўшинлари томонида қатнашган. Ватанига қайтгач, Миллий хавфсизлик давлат қўмитаси уни ҳибсга олган. 16 май куни Бишкекнинг Первомай туман суди Кубаничбек ўғлини Жиноят кодексининг 416-моддаси билан айбдор деб топган.
Унга нисбатан 10 йилга озодликдан маҳрум қилиш жазоси тайинланган. Бишкек шаҳар суди биринчи инстанция ҳукмини ўз кучида қолдирган.
Пойтахтдаги тергов изоляторида бўлган Қирғизистон фуқароси Россия матбуотига интервью берган.
Асқар, айтингчи, нега Украинадаги “махсус операцияда” қатнашишга қарор қилдингиз?
— Дронларни бошқара оладиган кўнгиллилар камлигини билгач, бориш ҳақида ўйладим. Қирғизман, лекин ўзимни рус деб биламан.
Қачон ва нима учун хизматни тарк этишга қарор қилдингиз?
— 2022 йил октябрь ойида акамдан отамнинг бетоб экани, отам билан учрашишим кераклигини билдим. Дадам фронтга кетганимни биларди: кетишдан олдин ундан дуо олдим. Ахир бобом ҳам Иккинчи жаҳон урушида қатнашган.
Қандай қилиб ва қачон ҳибсга олиндингиз?
— Ноябрда Бишкекка келдим, дадам билан учрашдим. Кейин оиламиз билан Янги йилни нишонладик, ўн кундан кейин қўлларимга кишан тақиб, мени уйдан олиб кетишди. Ҳибсга олиш пайтида менга Россия томонида жанговар ҳаракатларда қатнашганлик учун жиноий иш қўзғатилгани ҳақида хабар беришди.
Россия Федерацияси ва русларга қандайдир ариза ёки илтимос билан мурожаат қилмоқчимисиз?
— Мен Россияга, барча халққа мурожаат қилмоқчиман: ёрдам сўрайман, чунки урушда ихтиёрий равишда қатнашганим учун ўн йилга қамалганман. Ҳозир оғир аҳволдаман, Бишкекдаги тергов изоляторида ўтирибман. Менинг оилам ҳам қийин аҳволда: онам, дадам.
Бу ердан чиқиб, оилам билан бўлишим учун менга Россия паспорти ва фуқаролигини беришингизни сўрайман.
Ўзбекистон фуқароларига чет давлатларининг ҳарбий хизматига ёлланиш қонунан тақиқланади!
Ўзбекистон фуқаролари чет давлатларнинг (шу жумладан, Россиянинг) ҳарбий хизматига, хавфсизлик, полиция, ҳарбий адлия органлари ёки шунга ўхшаш бошқа органларига хизматга кириш, ёллангани учун Ўзбекистон Жиноят кодексининг 154,1-моддасига кўра 3 йилдан 5 йилгача озодликни чеклаш ёки озодликдан маҳрум қилиш билан жазоланади.
Бундан ташқари, ёлланиш учун ҳам Жиноят кодексининг 154-моддасида жавобгарлик белгиланган. Унга кўра, ёлланма аскар бўлганлар 7 йилдан 12 йилгача озодликдан маҳрум этилади. Бундай жавобгарлик бошқа давлатлар (хусусан, қўшни давлатнинг) Жиноят кодексларида ҳам белгиланган.
Масалан, Тожикистон Жиноят кодексининг 401,1-моддасига кўра 12 йилдан 20 йилгача қамоқ жазоси, Қирғизистон Жиноят кодексининг 416-моддасига кўра 7 йилдан 15 йилгача қамоқ жазоси, Қозоғистон Жиноят кодексининг 162,1-моддасига кўра эса 7 йилгача озодликдан маҳрум этиш жазоси назарда тутилган. Ўзбекистон фуқаролари фақат Ўзбекистон армиясида хизмат ўташлари мумкин.
Изоҳ (0)