Хоразм вилоятининг Янгиариқ, Андижон вилоятининг Улуғнор, Бухоро вилоятининг Бухоро тумани ва Тошкент вилоятининг Бекобод шаҳарларида газ ва электрдан ноқонуний фойдаланилди.
Маълум қилинишича, Янгиариқ тумани жойлашган “Ғ.Т.” МЧЖга қарашли метан заправка табиий газдан ноқонуний фойдаланиб келган. Хусусан, шохобчанинг торайтирувчи қурилма камерасига ўрнатилган пломба бузилган.
Ушбу қоидабузарлик натижасида газ таъминоти корхонасига 505,8 млн сўмлик зарар етказилган.
Шунингдек, Улуғнор туманида “И.Э.” оилавий нодавлат боғча масъул шахслари тижорат мақсадида умумий фойдаланишдаги табиий газ тармоғига ўзбошимчалик билан уланиб, 226 млн сўмлик табиий газдан ноқонуний фойдаланган.
Шу билан бирга, Бухоро туманида фуқаро Ш.Қ. ўзининг яшаш хонадонида ишлаб чиқариш цехи ташкил қилиб, умумий фойдаланишдаги электр тармоғига тижорат мақсадида яширин тарзда уланиб, жами 118,2 млн сўмлик электрдан ноқонуний фойдаланган.
Бундан ташқари, Бекобод шаҳрида “О.-И.” МЧЖ раҳбари Ғ.З. “Маърифат” МФЙ ҳудудидаги чиқинди тўплаш шохобчасида тижорат мақсадида электр тармоғига ўзбошимчалик билан тўғридан-тўғри уланиб, 101,8 млн сўмлик электрдан ноқонуний фойдаланган.
Мазкур ҳолатлар юзасидан Жиноят кодексининг 169-моддаси (ўғрилик) билан жиноят ишлари қўзғатилиб, тергов ҳаракатлари ўтказилмоқда.
Бундай ҳолатлар сони ортиб бормоқда
Самарқанд вилоятидаги корхоналардан бири 553 миллион сўмлик электрдан ноқонуний фойдалангани аниқланганди. Шу билан бирга, Қашқадарёда 177 млн сўмлик газ ва “свет”дан ноқонуний фойдаланган шахслар ушлангани хабар қилинганди.
Шунингдек, Қашқадарёда электрдан ноқонуний фойдаланган корхона давлатга 1 млрд сўмдан зиёд зарар етказган. Бундан ташқари, Тошкент, Самарқанд ва Қашқадарё вилоятларида энергия ресурсларига ноқонуний уланиш ҳолатлари фош этилганди. Шунингдек:
- Бухорода 1,2 млрд сўмлик электрдан ноқонуний фойдаланилгани аниқланди.
- Қорақалпоғистоннинг учта ҳудудида 845 млн сўмлик газдан ноқонуний фойдаланилди.
- Бухоро ва Жиззахда электрдан ноқонуний фойдаланганлар 360 млн сўмдан зиёд зарар етказди.
- Учта вилоятда қарийб ярим млрд сўмлик газдан ноқонуний фойдаланилди.
Изоҳ (0)