Германия яримўтказгичларни тайёрлаш ва ишлаб чиқаришга 2 миллиард евро сармоя киритмоқчи.
Бу ҳақда Bloomberg манбаларга таяниб ёзмоқда.
Уларнинг сўзларига кўра, Германия ҳукумати ушбу маблағларни яримўтказгичлар, улар учун бутловчи қисмлар ва бошқа маҳсулотлар ишлаб чиқариш билан боғлиқ 10–15 лойиҳа ўртасида тақсимламоқчи.
Германия Иқтисодиёт вазирлиги матбуот котиби Анника Эйнхорн чип ишлаб чиқарувчиларга саноатнинг “ҳозирги ривожланиш даражасидан сезиларли юқори бўлган замонавий ишлаб чиқариш қувватларини” ривожлантириш учун маблағ ажратиш режалаштирилаётганини тасдиқлади. Бироқ у тафсилотларни келтирмади.
Ўтган йили Германия яримўтказгичлар ишлаб чиқариш саноатини ривожлантиришга 20 миллиард евро сармоя киритишни режалаштираётгани ҳақида маълум бўлганди. Бироқ ҳозирда оғир кунларни бошдан кечираётган Intel ушбу корхона қурилишини кейинга қолдирган.
Аввалроқ Илон Маскнинг нейрочиплар ишлаб чиқарувчи Neuralink компанияси Канада регуляторларидан мамлакатда ўз қурилмасининг клиник синовларини бошлаш учун рухсат олгани хабар қилинганди.
Синов жараёни Торонтодаги University Health Network (UHN) шифохоналаридан бирида бўлиб ўтади.
“Биз нейрохирургия соҳасидаги ушбу илмий янгиликнинг етакчи сафида турганимиздан жуда фахрланамиз”, деди шифохона раҳбари Кевин Смит.
Маск компанияси АҚШда бир неча беморларга мия имплантларини ўрнатган эди. Компаниянинг илк бемори — саккиз йил аввал елкасидан паст қисми шол бўлган 29 ёшли Нолан Арбога кўра, қурилма туфайли у компьютердан фойдаланиш ва ҳатто видео ўйинлар ўйнашга қодир бўлди. Эркакнинг сўзларига кўра, чипни имплантация қилиш унга ҳаёт сифатини яхшилаш, “дунё билан қайта боғланиш”, ижтимоий алоқаларни тиклаш, эркин бўлиш ва мақсадларга эришиш имконини берган.
Изоҳ (0)