Женевада Америка делегацияси АҚШ Украинада кам таъминланган фуқаролар ва руҳий шифохона беморлари устида биологик тадқиқотлар ўтказганини тан олди. Бу ҳақда Россия Қуролли кучлари радиациявий, кимёвий ва биологик ҳимоя қўшинлари бошлиғи генерал-лейтенант Игорь Кириллов маълум қилди, деб ёзади «РБК».
Россия Мудофаа вазирлиги хабарига кўра, 5—9 сентябрь кунлари Женевада Биологик ва заҳарли қуролни тақиқлаш тўғрисидаги конвенцияга аъзо мамлакатлар йиғилиши бўлиб ўтган. Тадбир Москва ташаббуси билан ўтказилган бўлиб, унинг фикрича, АҚШ ва Украина ҳужжат низомларини бузган.
Махсус операциялар бошланганидан буён Россия ҳукумати АҚШ Украинада биологик қурол ишлаб чиқиш билан шуғулланганига оид далиллар топганини бир неча марта маълум қилганди. Шу муносабат билан сентябрь бошидаги йиғилишда Россия вакиллари Вашингтон ва Киев вакилларига 20 дан ортиқ саволлар берди, улар орасида украиналик ҳарбийлар ва руҳий хасталар устида юқумли касалликлар қўзғатувчилари ва заҳарли моддалар иштирокида қандай тадқиқотлар ўтказилгани ҳақидаги саволлар ҳам бор эди.
Америка ва Украина томонларининг украиналик фуқаролар штаммлари ва биоматериаллари олиб кетилиши ҳамда ҳарбий хизматчилар, кам таъминланган фуқаролар ва «аҳолининг энг кам ҳимоя қилинган тоифаси — психиатрия касалхоналари беморлари» устида тадқиқотлар ўтказиш чоғида ахлоқ меъёрларига риоя этилиши юзасидан изоҳлари «ҳеч ҳам ишонарли туюлмади», деди Кириллов.
«Америка делегацияси бундай фактларни тан олди ва патоген биоматериаллар намуналари АҚШга унчалик тез-тез олиб кетилмаганини қайд этди. Хорижга юборилаётган бионамуналар ҳажми ва даврийлигини баҳолаш имконини бермайдиган ушбу изоҳдан ташқари, мажлис иштирокчилари бошқа ҳеч қандай тушунтиришлар бергани йўқ», — деди Россия Мудофаа вазирлиги вакили.
Украинада Пентагон буюртмасига кўра ишлаган биологик лабораториялар тармоғи ҳақида Кириллов март ойида, Россия махсус операцияси бошланганидан кейин маълум қилганди. У гап хавфли микроорганизмлар штаммлари тўпланиб, АҚШга юборилиши ва биоқурол потенциал агентлари ўрганилиши ҳақида бораётганини даъво қилганди. Федерация кенгаши лаборатория фаолияти юзасидан суриштирув ўтказишга қарор қилди, Россия Тергов қўмитаси эса оммавий қирғин қуроли ишлаб чиқиш ҳақидаги модда бўйича жиноят иши очди. Муассаса раҳбари Александр Бастрикин даъво қилишича, Америка Украинадаги биодастурларни молиялаштиришга 2005 йилдан буён 224 миллион доллар сарфлаган.
АҚШдан Украинадаги биологик фаолиятини фош қилишни Хитой ҳам талаб қилиб чиққанди. Давлат департаменти ва Пентагон биологик қурол ишлаб чиқилишига алоқадорлигини рад этган, Украина президенти Владимир Зеленский эса Украинада ҳеч қачон оммавий қирғин қуроли ишлаб чиқилмаганини маълум қилган эди. БМТ эса Россиянинг Украинада ҳарбий биологик дастурлар борлиги ҳақидаги маълумотини текшириш бўйича мандат ва техник имкониятларга эга эмаслигини айтиб ўтганди.
Изоҳ (0)