Шавкат Мирзиёев раислигида 7 май куни ўтказилган йиғилишда соғлиқни сақлаш вазирининг икки ўринбосарлари лавозимидан озод этилди.
Йўл қўйилган камчилик ва хатолар учун соғлиқни сақлаш вазирининг ўринбосарлари Даврон Султанов, Фаррух Шарипов лавозимидан озод этилди, вазир ўринбосари Олим Омонов 6 ойда рақамлаштиришда ўзгариш қилмаса, ишдан олиниши ҳақида огоҳлантирилди.
Президент тиббий суғуртани жорий қилиш сурункали сурилиб келаётганини кескин танқид қилди. Тошкент шаҳрида ўтган йили, Қорақалпоғистон, Навоий, Самарқанд, Фарғона, Сурхондарё ва Хоразмда бу йили ушбу тизим ишга тушиши керак эди. Суғурта жамғармаси фақат тайёр пулни тақсимловчига айланиб қолгани кўрсатиб ўтилди.
“Белгиланган ислоҳотларимиз қанчалик тўғри бўлмасин, тизим рақамлашмаса, кутилган натижага эриша олмаймиз”, деди президент.
Лекин мутасаддилар тизимни тўлиқ рақамлаштириш у ерда турсин, оддий “электрон ресепт”ни ҳам ишга тушира олмагани танқид қилинди. “Электрон поликлиника”, “Электрон шифохона”ни жорий этишда ҳам жиддий оқсоқликлар борлиги айтилди.
Изоҳ (0)