Ўзбекистон ҳудудида шу кунларда совуқ об-ҳаво кузатилаётгани боис Фарғона водийсидаги автомобилларга газ тўлдириш компрессор станциялари 15 февраль куни соат 13:00 дан 16 февраль куни соат 06:00 гача фаолиятини вақтинча тўхтатади. Бу ҳақда «Ўзтрансгаз» АЖ матбуот хизмати хабар берди.
Маълум қилинишича, Вазирлар Маҳкамасининг 2018 йил 12 январдаги 22-сон қарори «Табиий газдан фойдаланиш қоидалари», 7-боб 58-банди ҳамда улгуржи ва автомобилларга газ тўлдириш компрессор станцияларига табиий газ етказиб бериш тўғрисида расмийлаштирилган икки томонлама шартнома шартларидан келиб чиқиб, вилоят ҳокимликлари томонидан тасдиқланган жадвалга асосан автомобилларга газ тўлдириш компрессор шохобчаларида чекловлар жорий қилинмоқда.
Бундан мақсад – биринчи навбатда табиий газ етказиб берилиши муҳим ҳисобланган аҳоли, шифохона, мактаб ҳамда мактабгача таълим ташкилоти каби аҳамиятга эга муассасалар, шунингдек, электр энергияси ишлаб чиқарувчи йирик станцияларнинг табиий газ таъминотида барқарорлигини таъминлашдан иборат.
«Ҳурматли истеъмолчилар, вақтинчалик чеклов чоралари ҳаво ҳарорати бироз кўтарилгунга қадар давом этади ҳамда АГТКШ тез орада аввалги тартибда ишлаш режимига ўтишини маълум қиламиз», — дейилади хабарда.
Эслатиб ўтамиз, 2021 йилнинг 17 ноябрдан бошлаб Ўзбекистондаги автомобилларга газ тўлдириш компрессор станцияларига вақтинчалик чеклов ўрнатилгани тўғрисида хабар берилганди. Ўшанда Энергетика вазирлиги магистрал ва тақсимловчи газ қувурлари ишида технологик режим бузилишларининг олдини олиш мақсадида автомобилларга газ тўлдириш компрессор шохобчаларида кечки ва тунги вақтлар оралиғида чекловлар жорий қилинишини эслатиб ўтган эди.
Изоҳ (0)