Ўзбекистондаги газ заправкаларининг иш вақтига чеклов ўрнатилди

Энергетика вазирлиги республика автомобилларга газ тўлдириш компрессор шохобчаларида чекловлар жорий қилинишини маълум қилди.

«Бундан мақсад – биринчи навбатда табиий газ етказиб берилиши муҳим ҳисобланган аҳоли, шифохона, мактаб ҳамда мактабгача таълим ташкилоти каби аҳамиятга эга муассасалар, шунингдек, электр энергияси ишлаб чиқарувчи йирик станцияларнинг табиий газ таъминотида барқарорлигини таъминлашдан иборат.

Ҳурматли истеъмолчилар, вактинчалик чеклов чоралари ҳаво ҳарорати бироз кўтарилгунга қадар давом этади ҳамда АГТКШ тез орада аввалги тартибда ишлаш режимига ўтишини маълум қиламиз», – дейилади вазирлик хабарида.

Хусусан, Фарғонада 17 ноябрдан бошлаб вилоят ҳудудидаги автомобилларга газ тўлдириш шохобчаларига табиий газ етказиб бериш ҳар куни соат 18:00 дан соат 06:00 га қадар тўхтатилади. Бу ҳақда «Ҳудудгаз Фарғона» газ таъминоти филиали директори Улуғбек Қўчқоров Telegram саҳифасида маълум қилган.

Филиал раҳбарининг қайд этишича, қиш мавсумида табиий газни етказиб беришда технологик режим жараёнларидаги газ билан боғлиқ ишлар бажарилиши муносабати билан, вилоятга келувчи табиий газ босимида пасайиш кузатилмоқда.

Шунингдек, мазкур қарор ҳавонинг кескин совуб кетгани сабаб биринчи навбатда аҳоли ва ижтимоий соҳа объектларини узлуксиз газ билан таъминлаш мақсадида қабул қилинган.

«Юқоридагилардан келиб чиқиб, автомобилларга газ тўлдириш шохобчаларига табиий газни етказиб бериш 17 ноябрдан тонг соат 06:00 дан соат 18:00 га қадар белгиланди. Вилоятимиздаги ҳайдовчилардан ўз автоуловларига газ тўлдиришда ҳар кунлик белгиланган вақт (06:00 – 18:00) оралиғида газ тўлдириш ишларини техника хавфсизлик қоидалари асосида амалга оширишларини сўраймиз», — дейилади «Ҳудудгаз Фарғона» газ таъминоти филиали раҳбарининг ахборотида.

«Дарё» мухбирининг маълум қилишича, сўнгги кунларда вилоятдаги метан заправкалар олдида навбатлар юзага келишни бошлаган. Айрим автомобилларга газ тўлдириш шохобчалари эса вақтинча фаолиятини тўхтатган.

Шунингдек, «Ўзтрансгаз» АЖнинг «Gazeta.uz»га маълум қилишича, Жиззах вилоятидаги 68 та газ қуйиш шохобчасида соат 17:00 дан 23:00 гача газ таъминоти тўхтатилади. Ушбу жадвал ҳаво ҳарорати кескин пасайганда кучга киради.

Метан заправкаларга чекланган вақт давомида газ етказиб бериш тартиби қачонгача давом этиши маълум қилинмаган.