15 февраль куни Исроил қуролли кучлари Хон Юнус шаҳридаги Нассер касалхонасига кирди. Бу ҳақда CNN нашри хабар бермоқда.
ҲАМАС бошқарувидаги Ғазо Соғлиқни сақлаш вазирлиги ҳамда Исроилнинг IDF бўлинмаси бу хабарни расман тасдиқлаган. Бир қатор араб нашрлари ҳам бу ҳақда маълум қилган.
Исроил махсус кучлари штаби матбуот котиби Даниэль Ҳагарининг билдиришича, IDF аскарлари Ҳамас томонидан гаровда сақлаб келинган бир қанча асирларни озод қилган. Махсус кучлар, шунингдек, исроиллик асирлар орасида вафот этганлар ҳам бўлиши мумкинлиги боис шифохона ҳудудида қўшимча текширув ўтказишни мақсад қилган. Расмий Тель-Авив даъвосига кўра, ҲАМАС Нассерда узоқ вақт асирларни сақлаб келган.
Ҳарбийлар асирларнинг озод қилингани ёки жасадлар топилган борасидаги далил ва исботларни оммага ҳали тақдим этмаган. Ўрта Шарқ нашрлари тарқатаётган хабарлар эса Исроил баёнотига мутлақо зид.
Даниэль Ҳагарига кўра, Исроил Нассер касалхонасида “шартли ва чекланган” операция ўтказмоқда.
13 февраль куни ижтимоий тармоқларнинг араб сегментида Нассер касалхонасига бульдозерлар билан шикаст етказилгани ҳақидаги видеолар пайдо бўлган эди. Ҳудуд ўраб олингани, касалхонани тарк этишни хоҳлаган бир қанча ғазоликлар отиб ташлангани ҳақидаги хабарлар кенг тарқалган эди.
Изоҳ (0)