Молдова Республикасининг пойтахтида жойлашган “Кишинёв-Арена” спорт мажмуасида “Оловиддин ва минг бир кеча эртаклари” муз шоуси пайтида нохуш ҳодиса содир бўлди.
Маълум қилинишича, акробатик ҳаракат вақтида икки нафар ижрочи — йигит ва қиз арқонлар ёрдамида саҳна шифтига кўтарила бошлаган, бироқ бир лаҳзада қиз тахминан уч метр баландликдан муз устига йиқилган.
Содир бўлган воқеа ижтимоий тармоқларда тарқалган видеога тушиб қолган. Йиқилгандан сўнг раққоса қимирламай ётганини кўриш мумкин. Воқеа жойига тез тиббий ёрдам етиб келиб, жабрланувчини касалхонага олиб кетган. Томоша эса давом этган.
Suhih Production компанияси ўзининг Facebook саҳифасида қизнинг оёқлари синганини ва лат еганини, у тез ёрдам шифохонасида шифокорлар назорати остида эканлигини маълум қилган.
“Бугунги кунда муз шоуси раққосаси билан содир бўлган ва тахминан уч метр баландликдан йиқилиш билан якунланган ҳодиса бўйича бизга маълум бўлишича, воқеа жойида дарҳол жиҳозлар текширилган ва улар тўлиқ соз ҳамда ишчи ҳолатда бўлган. Видеокамералардан олинган тасвирлар батафсил ўрганилгандан сўнг, раққоса қўл кафтини тегишли тарзда маҳкамламагани ва бу фожиали оқибатларга олиб келгани маълум бўлди.
Ҳозирги вақтда биз шоу ташкилотчиси ва продюсери сифатида қизнинг аҳволини кузатиб, шифохона тиббиёт ходимлари билан алоқада бўлиб турибмиз.
Раққоса нима сабабдан хавфсизлик қоидаларига риоя қилмагани номаълум. Ушбу воқеа бугун томошада содир бўлганидан чин дилдан афсусдамиз”, дейилади Suhih Production баёнотида.
Изоҳ (0)