Ўзбекистон элчихонаси ходимлари (қароргоҳи Будапешт шаҳрида жойлашган) Хорватияда оғир тан жароҳати олган Ўзбекистон фуқароси ватанга қайтишига амалий ёрдам кўрсатди. Бу ҳақда “Дунё” АА хабар берди.
Элчихона маълумотига кўра, Н.С. 2024 йилда ишлаш учун Загреб шаҳрига келган. 2024 йил 29 ноябрь куни у йўл-транспорт ҳодисаси оқибатида оғир тан жароҳати олган ва Загреб шаҳридаги марказий шифохонага ётқизилган. Бемор ўтган вақт давомида доимий тарзда шифокорлар назоратида бўлди.
Ўзбекистон элчихонаси воқеа содир бўлган дастлабки кунларданоқ вазиятни назоратга олди. Дипломатик миссия шифокорлар ва шифохона вакиллари билан фуқаронинг аҳволи юзасидан мулоқот қилиб турди. Жабрланувчининг оила аъзолари билан ҳам яқин мулоқот ўрнатилди ва беморнинг аҳволи тўғрисида аниқ маълумотлар тақдим этилди.
Беморнинг мураккаб аҳволи инобатга олиниб, дипломатик ваколатхона ташаббуси билан, Миграция агентлиги ва Ўзбекистон Соғлиқни сақлаш вазирлиги кўмагида юқори малакали тиббиёт мутахассиси Хорватияга олиб келинди.
Фуқаро Н.С. 11 апрель куни Ўзбекистонга муваффақиятли етказилди. У Ўзбекистонда ихтисослаштирилган тиббиёт муассасасига жойлаштирилган ва керакли даволанишни давом эттирмоқда.
Фуқаронинг даволаниши учун кетган тўловлар суғурта компанияси ва иш берувчи томонидан қопланди.
Ўзбекистонга қайтарилаётган фуқаролар
2025 йилнинг бошларида Россиянинг Тива Республикаси Оқ Довурак шаҳрида вақтинча ишлаётган тўрт нафар Ўзбекистон фуқароси ватанга қайтарилди. Фуқароларнинг яшаш жойида содир бўлган кучли ёнғин натижасида уларнинг ҳужжатлари, шу жумладан, паспортлари йўқолган.
27 февраль куни Маккада оғир касалликка чалинган ўзбекистонлик ватанга қайтарилди. Февраль ойи охирида Россияда икки боласи билан қийин вазиятда қолган аёл Ўзбекистонга қайтарилди.
2025 йил 5 март куни Россиянинг Владивосток шаҳрида оғир тан жароҳати олган Ўзбекистон фуқароси ватанга қайтарилди. Март ойининг ўрталарида Новосибирскдаги Бош консулхонаси кўмагида Россиянинг Саха республикаси Нерюнгри шаҳрида қийин ҳаётий вазиятга тушиб қолган она ва унинг тўрт нафар фарзанди Ўзбекистонга қайтарилди. 17 март куни ота-она қарамоғисиз қолган 10 нафар вояга етмаган бола Қозоғистондан Ўзбекистонга қайтарилди. Шунингдек, Россияда ота-она қарамоғисиз қолган 30 нафар бола Ўзбекистонга қайтарилди.
Изоҳ (0)