Вазирлар Маҳкамасининг 2020 йил 10 ноябрдаги «Туғилганликни қайд этиш билан боғлиқ комплекс давлат хизматларини кўрсатишнинг маъмурий регламентини тасдиқлаш тўғрисида»ги қарорига кўра, туғилганликни қайд этиш билан боғлиқ комплекс давлат хизматларини кўрсатиш йўлга қўйилади. Бу ҳақда «Gazeta.uz» хабар қилган.
Тўлиқ автоматлаштирилган мазкур хизматлар аввалига Тошкент ва Нукус шаҳарларида, 2021 йил 1 февралдан бошлаб барча вилоятлар марказларида, 2021 йил 1 сентябрдан эътиборан эса бутун республика ҳудудида кўрсатилади.
Қарор билан тасдиқланган маъмурий регламентга мувофиқ, туғруқхона (шифохона) ходими бола туғилганидан сўнг 1 кун ичида бола ва ота-онаси ҳақидаги маълумотларни «Туғилиш ва ўлимни, шу жумладан, перинатал ўлимни электрон рўйхатга олиш» ахборот алмашинуви тизимига киритади. Маълумотлар автоматик равишда «ФҲДЁ ягона электрон архиви» ахборот тизимига юборилади.
ФҲДЁ бўлими маълумотларни қабул қилиб олганидан сўнг 3 иш соати ичида туғилганликни қайд этади ва далолатномани расмийлаштиради. Шунингдек, бошқа давлат хизматларидан комплекс тарзда фойдаланишни таъминлайди.
Маълумотлар автоматик равишда Ички ишлар, Мактабгача таълим, Соғлиқни сақлаш вазирликлари ва бюджетдан ташқари Пенсия жамғармаси ахборот тизимларига юборилади.Ахборот тизимлари орқали:
- Туман (шаҳар) ички ишлар бўлими болани 1 кун ичида тегишли манзил бўйича доимий рўйхатга қўяди.
- Мактабгача таълим вазирлиги мактабгача таълимни бошқаришнинг ахборот тизимида сўровда кўрсатилган боғчага болани автоматик равишда навбатга қўяди.
- Соғлиқни сақлаш вазирлиги 1 иш куни ичида она рўйхатда турган поликлиникага (доимий ёки вақтинча рўйхатда турган яшаш манзилидаги поликлиникага) болани рўйхатга қўяди.
- Пенсия жамғармаси бўлими фарзанд туғилганда бериладиган бир марталик нафақа пулини автоматик равишда расмийлаштиради.
Юқоридаги барча ҳолатларда масъул ташкилотлар томонидан мурожаат этувчига (ота-она ёки васийга) смс-хабарнома орқали ариза ҳолати ҳақида хабар етказилиб турилади.
Мазкур регламент талаблари қуйидаги ҳолатларда қўлланилмайди:
- Никоҳда бўлмаган ота-онадан туғилган болани уларнинг биргаликдаги аризаси асосида туғилишини қайд этишда;
- Топиб олинган (ташлаб кетилган) боланинг туғилишини қайд этишда;
- Ўлик туғилган бола туғилишини қайд этиш, ҳаётининг биринчи ҳафтасида ўлган (перинатал ўлим) болаларни, шунингдек, эгизакларнинг бири ўлик туғилганида ёки ҳаётининг биринчи ҳафтасида нобуд бўлганида.
Изоҳ (0)