“Бу яна такрорланди... чунки бу шунчалик кўп марта содир бўлганки, энди бу тушунтириб бўлмайдиган нарса”, — деган эди “Реал”нинг сеҳри ҳақида Анчелотти ўтган мавсум “Бавария”га қарши ЕЧЛ ярим финалидан сўнг (2:1, умумий ҳисоб 4:3) журналистларга.
Деярли ҳар мавсумда Мадрид клуби камбеклар амалга оширади, унутилмас ўйинларни тақдим этади ва Чемпионлар Лигасида ақл бовар қилмас ғалабаларга эришади. Аммо бу мўжиза қачон бошланган? Дарҳақиқат, стадионда “қаймоқранглилар”нинг 12-ўйинчиси бўлиши ва уларга қарши 90 дақиқа ўйнаш жуда узоқлик қилиши ҳақида гаплар бошлангандадир?
Мўжизанинг бошланиши: клуб тарихидан абадий жой олган дастлабки камбеклар
Ушбу турнирнинг биринчи финалидаёқ “Реал” ўйинни остин-устун қилиб, ғалаба қозонишга муваффақ бўлган. 1955/1956 йилги мавсум Чемпионлар Кубоги (1992 йилгача турнир номи шундай эди) учун биринчиси эди. Финалда Испания (“Реал Мадрид”) ва Франция (“Реймс”) чемпионати вакиллари тўқнаш келган.
Ўйиннинг 10-дақиқасидаёқ “Реймс” 2:0 ҳисобида олдинда бораётган эди, бироқ “қаймоқранглилар”га ҳисобни тенглаштириш учун 16 дақиқа етарли бўлди. Жамоалар танаффусга дуранг натижа билан йўл олганди. Иккинчи бўлимда “Реймс” яна ҳисобда олдинга чиқиб олди. Испан жамоаси яна мувозанатни тиклади. 79-дақиқада эса олдинга чиқиб олди. Дастлабки Еврокубок финалида 4:3 ҳисоби қайд этилган. “Реал” эса дастлабки Чемпионлар Кубогининг ғолибига айланган. Мадридликлар ундан кейин яна 4 марта кетма-кет чемпионликни нишонлаган.
Тарихдаги илк Ремонтада
1975/76 йилги мавсумдаги Чемпионлар Кубогида “Реал” илк бор биринчи ўйиндаги мағлубиятдан кейин 3 та тўп фарқини йўққа чиқара олган. Турнирнинг 2-турида “Дерби Каунти” ва “Реал Мадрид” жамоалари ўзаро баҳс олиб борди. Биринчи ўйин испан жамоасининг 1:4 ҳисобидаги мағлубияти билан якунланди.
Жавоб ўйини эса “Реал”нинг уй стадионида бўлиб ўтган. 95 минг томошабин қаршисида “қаймоқранглилар” Мартинес, Сантиляна ва Пиррининг голлари эвазига инглизларни қуролсизлантирди. Ғолиб номи қўшимча вақтларда аниқланадиган бўлди, экстра-таймда эса Сантиляна ажойиб голи билан “Мадрид”ни кейинги босқичга олиб чиққан эди.
“Реал” ярим финалга қадар етиб борган ва унда бўлажак чемпион — “Бавария”га имкониятни бой берганди.
Орадан 4 йил ўтиб, “Мадрид” яна имконсиз ишни амалга амалга оширди, клуб яна британиялик рақибини таслим этди. Турнирнинг чорак финалида Глазгонинг “Селтик” жамоаси мадридликларга рақиблик қилди. Дастлабки ўйин “Селтик Парк”да кечган ва унда мезбонлар 2:0 ҳисобида зафар қучган. “Реал” эса мусобақадан чиқиб кетиш арафасида эди.
Бироқ “Сантяго Бернабеу”даги ўйин барчасини ўз ўрнига қўйди. Сантиляна ва Штилике биттадан гол урганди. Ўйин қўшимча бўлимларга қадар давом этишига қараб кетаётган бир вақтда, учрашувнинг 86-дақиқасида Хуанито ғалаба голини киритишга муваффақ бўлган. Шу тариқа “Қироллик клуби” ярим финалга йўл олган. Лекин кейинги босқичда Германиянинг “Гамбург” жамоасига қарши баҳсда ютқазиб қўйган.
УЕФА Кубоги ғолиблигига қадар йўл. Афсонавий иборанинг пайдо бўлиши
1984/85 йилги мавсумдаги УЕФА Кубоги учун эсда қоларли саёҳатни 2022 йилги Чемпионар Лигасидаги ғалабага таққослаш мумкин. Барчаси турнирнинг 2-босқичидан, Югославиянинг “Риэка” жамоасидан бошланган.
“Қаймоқранглилар” дастлабки ўйинда кутилмаганда имкониятни бой берган (1:3), агар Исидронинг сўнгги дақиқаларда урган голи бўлмаганда, барчаси ачинарли тугаши мумкин эди. Бироқ “Бернабеу”даги ўйиннинг 34-дақиқасида Югославия клубининг бир футболчиси четлатилди. 67, 79 ва 82-дақиқаларда эса гол ўтказиб юборди, ундан ташқари яна икки футболчиси қизил олишга улгурган.
Бу Мадрид клубининг ўша турнирдаги ақл бовар қилмас ҳаракатларининг бошланиши эди. Кейин эса бу янада кўпайди
Кейинги босқичдаёқ Бельгиянинг “Андерлехт” клубига қарши баҳсда муаммолар бошланди. “Реал” Брюсселдаги оғир ўйинда 0:3 ҳисобида мағлуб бўлди.
Аммо “Мадрид”га йирик мағлубият тетиклашиб олиши учун восита ролини ўтади ва “Бернабеу”да “Андерлехт” тор-мор этилди. Санчис 2-дақиқадаёқ ҳисобни очган бўлса, Валдано дубль қайд этган, Эмилио эса ҳет-трик муаллифига айланган.
Кейин ярим финал — мусобақадаги энг қизиқарли воқеалар. Испан клуби Миланнинг “Интер”ига қарши баҳс олиб борган. Биринчи ўйин Италияда бўлиб ўтган ва унда мезбонлар Лиам Бреди ва Алессандро Алтобеллининг голлари эвазига ғалаба қозонган. “Нераззури” жавоб ўйини олдидан устунликка эга бўлганди.
Мағлубиятга қарамасдан ўйин охирда Хуанито ўз характерини кўрсатиб, “Интер” футболчиларига мурожаат қилган. Ўзининг ҳақоратларида у ўлмас иборани қўллаб ўтган: “ ‘Бернабеу’да 90 дақиқа жуда узоқ вақт”. Бу мадридликларнинг ҳали курашдан чиқмаганини англатарди.
“Сантяго Бернабеу”даги жавоб баҳсида “Реал” Сантилянанинг дубли ва Мичелнинг голлари эвазига 3:0 ҳисобида ғалаба қозонган.
Хуанитонинг сўзлари эса “жамоатчилик мулки”га айланди ва кўп ўтмай “Реал” мухлислари бу сўзларни италян тилида байроққа ёзиб, стадион трибуналаридан бирига илиб қўйган.
Финалда эса ўлмас “Реал” “Видеотон” клубини тор-мор этган. “Қироллик клуби”нинг ўша мусобақадаги чемпионлиги худди афсонавий Хуанито каби тарихга ўчмас қилиб муҳрланган.
Тарих такрорлардан иборат
Кейинги 1985/86 йилги мавсумдаги УЕФА Кубоги яна янги сюрпризларни тайёрлади. Юпп Ҳайнкесс бошчилигидаги Гладбахнинг “Боруссия”си “Реал”ни 5:1 ҳисобида мағлуб этди. Бундай мағлубиятдан кейин, одатда, қайта тикланиш мумкин эмасдек эди, бироқ “Реал” ҳеч қачон бунга рози бўлмасди. Мадридда ўтган учрашувда эса мезбонлар 4:0 ҳисобида рақибини ер тишлатган.
“Реал” ва “Интер” яна ярим финалда тўқнаш келган. Биринчи ўйин Италияда бўлиб ўтган, яна “нераззури” ғалаба қозонган, бу сафар ҳисоб — 3:1. Жавоб ўйинида эса испанлар 5:1 ҳисобида зафар қучган. Финалда эса “қаймоқранглилар” “Кёл”га қарши баҳс олиб борган ва 5:3 ҳисобида ғалаба қозонган.
XXI асрда нималар бўлди?
Дарҳол Мадрид клуби тарихидаги энг муҳим лаҳзалардан бири — 92:46 да урилган голни ёдга оламиз.
“Реал”нинг Лиссабондаги финалда “Атлетико”га қарши ўйини мухлислар ёдида бутун умр сақланиб қолади. “Атлетико” 1:0 ҳисобида ғалаба қозонаётган ва ҳакам қўшиб берган дақиқалар бораётган вақтда, Серхио Рамос бурчак зарбасидан оширилган тўпни боши билан дарвозага жойлаб, ҳисобни тенглаштирганди. Қўшимча бўлимларда эса “Реал” якуний ҳисобни 4:1 кўринишига олиб келган.
2021/22 йилги Чемпионлар Лигаси ҳам тарихдан муҳим жой олди. Турнир плей-оффида “Реал” ҳар бир босқичда камбек қайд этган. “ПСЖ”, “Челси” ва “Манчестер Сити” каби жамоалар жавоб баҳсларида камбек эвазига мағлуб этилган. “Шаҳарликлар”га қарши ўйин умуман қойилмақом кечган.
Англиядаги биринчи ўйин Манчестер клубининг 4:3 ҳисобидаги ғалабаси билан якунланган. Жавоб ўйинида эса “Реал” вазиятни ўнглаш учун битта гол киритиши лозим эди. Бироқ 73-дақиқада мадридликлар яна тўп ўтказиб юборади. Энди қолган 15 дақиқа ичида 2 та гол керак эди. Сўнгги дақиқаларда эса ўйин тақдири ҳал бўлгандек эди, аммо Родриго имконсиз нарсани амалга оширган. 90 ва 90+1-дақиқада бразилиялик футболчи дубль қайд этиб, ўйинни қўшимча бўлимларгача боришига ҳисса қўшган. Қўшимча бўлимларда эса “Реал” тоза пенальти ишлаб олган ва Карим Бензема уни хотиржамлик билан амалга оширган. Якуний ҳисоб 6:5, мадридликлар фойдасига. Мусобақа финалида эса “Реал” “Ливерпуль”ни Винисиуснинг голи эвазига мағлуб этиб, 14-совринини боши узра кўтарган.
Ўтган мавсумда эса яна бир эртак гувоҳига айландик. “Бавария” ўз уйида 2:2 ҳисобини қайд этган. “Бернабеу”даги ўйинда эса 1:0 ҳисобида олдинда бораётган эди. Ўйин тугашига 2 дақиқа қолганида “Реал” ҳужумчиси Хоселу Мануэль Нойернинг хатосидан фойдаланиб, ҳисобни тенглаштирди. Орадан 2 дақиқа ўтиб, яна Хоселу дарвозани аниқ нишонга олиб, стадионни ларзага солди.
Хуанитонинг 40 йил олдин айтган гапи “Бавария”га қарши ўйин учун ҳам ишлади. Финалга чиқишини тантана қилишга тайёрланаётган рақибни хафа қилиш ва ўйин тақдирини ўзгартириб юбориши учун Хоселуга 163 сония кифоя қилди.
“Барчаси ҳолатга боғлиқ. Лекин “Реал”да нимадир бор, чунки бундай камбеклар ўз-ўзидан содир бўлмайди. Балки барчаси клубнинг тарихи, анъаналари ва сифатига боғлиқдир. Бу саволга аниқ жавоб беролмайман, бироқ бу нарса жуда кўп марта содир бўлган. Шунинг учун бу аниқ тасодиф эмаслигини айта оламан”, — деган эди Карло Анчелотти.
“Реал” ҳозир ҳам қадрланадиган енгилмас жамоа афсонасини яратди. Бу муносиб эътироф эканлигини айтиш мумкин. Шунинг учун “Реал” футболчиси ҳакам томонидан қўшиб берилган дақиқаларда ғалаба голини уриши бахтли тасодиф эмас, мерос сифатида қабул қилинади.
“Реал”нинг уй стадиони идеал ёдгорликка, имконсиз нарсалар содир бўладиган ўлмас жамоанинг уйига айланган. Мўжизалар майдони. “Реал”нинг бутун тарихи давомидаги эпик ва қаҳрамонона табиати худди унинг ДНКси сингари сингиб кетган.
Изоҳ (0)