“Қалблар маликаси” орамизда йўқлигига қарийб 28 йил бўлди. Шунга қарамай, малика Диананинг сирли ўлими ҳанузгача барчада катта қизиқиш уйғотмоқда. Чарльз III нинг собиқ рафиқасини фожиа сари нима олиб борган эди?
Қироллик оиласи ҳаётини кузатувчи экспертларнинг фикрича, Диана ҳаётининг сўнгги кунида тушиб қолган вазияти кўринганидан ҳам мураккабдир. Малика бундай воқеалар марказида бўлишига аслида унинг ўзи сабабчи бўлган бўлиши мумкин.
Диана сўнгги ёзини Сен Тропедаги яхтада ўтказди. Чарльз билан ажрашганидан сўнг, малика ҳам, унинг собиқ эри ҳам ўғиллари Уилям ва Гарри билан бир хил муддатда биргаликда вақт ўтказиш ҳуқуқига эга эди.
Диана фарзандларини Миср миллиардерларидан бири — Муҳаммад Ал-Файиднинг яхтасига олиб борган. Малика яқин дўстларининг айтишича, у ўша дамларда ўзини жуда бахтли ҳис қилган.
Сўнг орадан бир неча кун ўтиб, Диананинг яхтадаги суратлари матбуотда пайдо бўлди. Буни кўрган барча ҳайратдан ёқа ушлаган эди: журналистларга Сен Тропедаги малика ҳақида ким хабар берди? Диананинг яқинлари аввалига бунда яхта ходимларини айблади, аммо кейинчалик маълум бўлишича, буларнинг ортида маликанинг ўзи турган.
Қироллик биографи Тина Брауннинг фикрича, Диана бу суратлар оммага тарқалишини ўзи истаган. Ўша пайтда ҳиссиётларга берилган малика ҳали ҳам шифокор Ҳаснат Хон билан ажримдан кейин ўзига келмаган эди. Сен Тропенинг гўзал манзаралари унга “қасос олиш” учун айни муддао бўлиб туюлган. Тина Браун бу ҳақда Palace Papers нашрида шундай ёзади:
Диана шахсий ҳаётига аралашишга йўл очиб берган эди, у кўпинча инжиқлик сабабли ҳаётидаги эркакларни рашк қилишга мажбур қилишни истаган. Айнан ўзи италиялик сураткаш Марио Бреннага манзилини берган ва шу орқали Ҳаснат Хонга истеҳзоли хабар юбормоқчи бўлган.
Бундай “қайноқ” суратлардан кейин папарацци маликани соя каби таъқиб қилгани ажабланарли эмас. Бунинг учун Диана Ал-Файидлар оиласига чуқур миннатдорчилик билдирган. Сўнг Муҳаммаднинг ўғли Доди унга Парижда учрашув таклиф қилганида малика рад жавоби бера олмаган. Франциянинг пойтахтида ҳам Доди билан бирга малика Диананинг журналистлардан қочиши деярли имконсиз бўлган, улар машҳурларнинг ҳар бир қадамини кузатиб боришган.
Парижга етиб келгач, Диана ва Доди шаҳардаги машҳур “Ритз” меҳмонхонасига жойлашган. Бу меҳмонхона Ал-Файидлар оиласига тегишли бўлиб, у ерда жуфтлик папараццидан озгина бўлса-да, паноҳ топишга умид қилган. Аммо уларнинг ҳар бир ҳаракати юзлаб камералар остида бўлган.
Доди ва Диана кечки овқатдан сўнг папараццилардан яшириниш мақсадида орқа эшикдан чиқишга қарор қилишган ва Mercedes-Benz S280 русумли машинага ўтирган. Автомобилни Доди Ал-Файиднинг хавфсизлик ходими Анри Пол бошқараётган эди. Тахминларга кўра, ҳайдовчи маст ҳолатда бўлган.
Тунги соат 00:20 атрофида Сена дарёси бўйидаги машҳур Pont dе lʼAlmа туннелига кирган автомобиль катта тезликда ҳаракатланаётиб бошқарувни йўқотган ва туннел деворига урилган. Доди ва Анри воқеа жойида ҳалок бўлган. Диана эса оғир тан жароҳатлари билан касалхонага етказилган. Соат 4:00 да шифокорлар уни қутқариб қололмаслигини эълон қилишган.
Кейинчалик ўтказилган тергов натижалари автоҳалокатда ҳайдовчи Анри Полнинг маст ҳолатда машина бошқаргани ва папарацциларнинг машинани таъқиб қилгани ҳалокатга сабаб бўлганини кўрсатди. Шунга қарамай, кўпчилик ҳанузгача бу воқеада турли фитналарни ва қироллик оиласининг аралашувини тахмин қилади.
Изоҳ (0)