Ҳаётининг сўнгги йилларида Диана мухлисларига Чарльз уни ҳеч қачон севмаганини тез-тез айтиб ўтарди. Эҳтимол, малика чиндан ҳам шундай деб ўйлаган ёки ҳамманинг шундай деб ўйлашини истаган бўлиши мумкин. Шу билан бирга, Чарльзнинг яқин дўстлари ишонч билан айтишади: у Диана билан мустаҳкам оила қуришга чин дилдан ҳаракат қилган, аммо ҳамма нарса уларга қарши бўлган.
Бўлажак хотини билан учрашишидан олдин Чарльз аллақачон севиб қолганди. Камилла Паркер-Боулзга бўлган ҳислар шаҳзоданинг армиядаги узоқ хизматидан сўнг ҳам сўнмайди. Бироқ Виндзорлар бу никоҳга қатъиян қарши эдилар. Камилланинг зиддиятли обрўси унинг валиаҳд шаҳзодага турмушга чиқишига йўл қўймасди. Шундан сўнг Чарльзнинг ҳаётига Диана кириб келади.
Нуфузли зодагон оиладан чиққан ёш қиз Виндзорлар учун ғоят мос эди. Диана болалигидан шовқинли Лондондан узоқда, Спенсерларнинг оилавий мулкида улғайган. Қироллик оиласи шаҳзода учун бундан яхшироқ жуфт топиш мушкул деган қарорга келади. Диана ҳам малика бўлишидан мамнун эди. 19 ёшли қиз бўлажак эри ва унинг оиласига ёқишга қўлидан келганча ҳаракат қиларди.
Аммо 1981 йилдаги тўйдан кўп ўтмай, эр-хотин ўртасида дастлабки тушунмовчиликлар юзага кела бошлайди. Маълум бўлишича, Диана аслида бошқача характерга эга экан. Тўйдан олдин у Чарльзга ўзи ҳам худди у каби табиат қўйнида бўлишни ёқтиришини таъкидлайди. Аммо турмушининг биринчи йилидаёқ Диана Шотландиядаги Balmoral мулки ва овчиликни ёмон кўришини айтади. Маълум бўлишича, малика қироллик оиласига ўзининг табиатга бўлган муҳаббати ҳақида гапирганда шунчаки ҳазиллашган экан.
Диана билан кўп мулоқотда бўлган Balmoral ходимларидан бирининг фикрича, бу арзимас ёлғон эр-хотин ўртасидаги ишончни йўқ қилган. У қироллик мухбири Том Куиннга шундай дейди:
“Менимча, бу уларнинг муносабатлари ёмонлашувининг бошланиши бўлди, одамлар уларнинг ажралиши бошқа аёл туфайли бўлгани ҳақида қанчалик кўп гапирсалар ҳам, кичик ёлғон ўз таъсирини ўтказганди”.
Изоҳ (0)