Британия қироллик оиласи аъзолари доимий равишда жамоатчилик диққат марказида бўлади. Энг синчков кузатувчилар айрим қироллик аъзолари баъзида хавфсизлик қоидаларига амал қилмаслигини пайқаган. Гарчи қонун барчага тенг бўлса-да, шаҳзода Уилям ва малика Кейтнинг хавфсизлик камарини тақмаслигига бир қатор сабаблар мавжуд.
Қонунда бир нечта истиснолар бор: улардан бирида айтилишича, агар “қироллик оиласи аъзоси тож томонидан ёки тож номидан ташкил этилган тантанали юриш ва шу каби маросимда иштирок этса, у ҳолда хавфсизлик камарини тақмасликка рухсат этилади”.
Ҳатто Уэлс шаҳзодаси ва маликаси расмий маросимда қатнашмаётган пайтда ҳам, улар кўпинча полициячилар ёки шахсий хавфсизлик ходимлари ҳамроҳлигидаги расмий автокортеж таркибида бўлади. Қонун нуқтайи назаридан, бу ҳам “маросим” сифатида баҳоланиши мумкин.
Масалан, ўтган ёзда шаҳзода Жорж, малика Шарлотта ва шаҳзода Луи Букингем саройига келган ва улар хавфсизлик камарисиз суратга олинган эди. Қироллик фарзандларининг келишини ҳамроҳ бўлган машиналар туфайли тож маросимий юриш деб ҳисоблаш мумкин. Бу хавфсизлик нуқтайи назаридан ҳам амалга оширилган бўлиши мумкин.
Қироллик қўриқчилари фикрича, бу каби қарорлар ҳар бир ҳолатга қараб алоҳида қабул қилинади. “Ҳар доим кутилмаган ҳолатлар бўлиши мумкин”, дейди хавфсизлик ходимлари бошлиғи. Улар турли таҳдид ва хавф даражасини ҳисобга олган ҳолда, ҳар бир вазиятни алоҳида таҳлил қилишади.
Унинг сўзларига кўра, баъзи ҳолатларда транспорт воситасидан тезда тушиш ёки чиқиш зарур бўлади, шунинг учун хавфсизлик камари тақилмаган бўлиши мумкин. Бу эса фавқулодда ҳолатда уларни машинадан тез эвакуацияни ташкил этишда ёрдам беради.
Бундай қарорларда шахсий хоҳишлар, вазиятнинг ўзига хослиги ва ташқи кўриниш ҳам ҳисобга олинади. Бунга ёрқин мисол қироллик тўйлари бўлиши мумкин. Хавфсизлик камарлари келин-куёвнинг байрамона кийимларини бекитиб қўяди ва суратлари чиройли чиқмайди. Қолаверса, кортеж секин ҳаракатланади, шунда халқ қироллик аъзоларини тўлиқ кўриши ва табриклаши учун вақт бўлади. Бундай ҳолатда хавфсизлик камари ҳеч қандай фойда бермайди.
Шубҳасиз, шаҳзода Уилям ва Кейт кўпчилик учун ибрат бўлишса-да, бу масалада уларга тақлид қилиш тўғри эмас. Улар баъзида йўл ҳаракати хавфсизлиги қоидаларини бузишга мажбур қилувчи ҳолатларда бўлишади. Шунга қарамай, оддий кундалик сафарларда, айниқса, шаҳар ташқарисидаги уйларга борганда ёки саёҳат қилганда, улар одатда хавфсизлик камарини албатта тақишади.
Изоҳ (0)