Мадриднинг “Реал” клуби янги чап қанот ҳимоячиси харид қилишни режалаштирмоқда. Бу ҳақда инсайдер Николо Скира ўзининг ижтимоий тармоқлардаги саҳифаларида маълум қилди.
Манбага кўра, “қироллик клуби” “Милан” аъзоси Тео Эрнандес бўйича расмий сўров юборган. Ҳозирда 27 ёшли франциялик ҳимоячининг “россонерилар” билан шартномаси 2026 йил ёзигача амал қилади.
Бироқ Италия клуби ҳамда футболчи янги битиб борасида музокара бошламаган. Шу сабаби Тео жорий мавсум якунида жамоани тарк этиши мумкин. Мадрид клуби эса вазиятдан фойдаланиб, Эрнандесни арзонроққа қўлга киритишни истамоқда.
Маълумот учун, футболчи 2017 йилдан 2019 йилгача “Реал” футболчиси бўлган. У клуб сафида 23 та учрашувда майдонга тушиб, 2 ассист муаллифига айланган.
Тео жорий мавсумда барча мусобақалар доирасидаги 48 та ўйинда иштирок этиб, 5 та гол ва 6 та голли узатмага муаллифлик қилди. Transfermarkt порталига кўра, футболчининг ҳозирги қиймати 40 миллион еврони ташкил этади.
Аввалроқ “Реал” “Арсенал”нинг марказий ҳимоячиси Вильям Салиба бўйича музокара бошлагани маълум бўлганди.
Шунингдек, “қироллик клуби” “Ливерпуль” футболчиси Иброҳим Конатени ўз сафига қўшиб олишни истаётгани хабар қилинганди.
Изоҳ (0)