Ўзбекистонда битирувчини ишга олган корхонага 5 миллиард сўмгача 18 фоизли кредит берилади. Бу ҳақда 8 август куни президент Шавкат Мирзиёев ўтказган йиғилишда маълум қилинди.
Президент ахборот хизматига кўра, ёшлар бандлигини таъминлаш учун банкларга 300 миллион доллар кредит ресурси ажратилган.
Йиғилишда кўп битирувчилар катта кредит олиб, қайтара олмаслигидан хавотирга тушган. Шу сабаб уларга ажратиладиган имтиёзли кредит ресурсининг бир қисмини битирувчини ишга олган корхоналарга ҳам бериш таклифи маъқулланган.
“Энди ишга олинган битирувчилар сонига қараб, тадбиркорларга 5 миллиард сўмгача 18 фоизли кредит берилади. Масалан, 1 миллиард сўмгача кредит олганлар камида 1 нафар, 5 миллиард сўм олганлар эса 5 нафар битирувчини ишли қилади. Имтиёзли кредит олган корхона битирувчини 2 йил ичида ишдан бўшаца, кредит фоизи тижорат ставкасига ўзгаради. Ушбу янги тизим нафақат бу йилги, балки олийгоҳни тугатганига 3 йил бўлмаган битирувчилар учун ҳам амал қилади”, дейилади манбада.
Йиғилишда олийгоҳ битирувчиларини ишга жойлаштириш бўйича хусусий сектор учун маъқул келадиган тизим яратилиши белгиланган. Бунинг учун Тадбиркорлар рейтингида алоҳида кўрсаткич қўшилади. Бунда тадбиркорлар ўзидаги бўш иш ўринлари ҳақидаги маълумотларни мутахассислик йўналиши билан киритади. Платформага олийгоҳлар ҳам уланиб, олийгоҳнинг “карьера маркази” битирувчини бўш ўрни бор корхона билан боғлаб беради. Энг муҳими, битирувчини ишга олганлик учун тадбиркорга қўшимча балл берилади.
Битирувчисини ярмидан кўпини ишга жойлаган “карьера маркази”га олийгоҳ жамғармасидан 500 миллион сўм мукофот берилади.
Аввалроқ эндиликда олийгоҳлар давлатдан тўпланган балларига қараб пул олиш тизими йўлга қўйилиши хабар қилинганди.
Изоҳ (0)