Замонавий ҳаёт тарзини танлаган ва нозик дид билан кийинадиган шарқ маликалари

Европа монархлари кўпинча протоколга қатъий риоя қилишлари учун танқидга учрайди, бу кўпинча ҳаддан ташқари вазминлик ва бир хиллик сифатида қабул қилинади. Бироқ Осиё маликалари ва қироличалари услуби стереотиплардан ташқарига чиқиб, хилма-хилликни намойиш этмоқда. . Бундан ташқари, уларнинг кўпчилиги мода дўконларини очиш орқали ўз брендларини яратмоқда.

Имон Афзон — Паҳанг маликаси

Имон Афзон Малайзияни 2014 йилдан 2019 йилгача бошқарган Паҳанг султони Абдуллоҳ II нинг тўнғич қизи ҳисобланади. Кўплаб қироллик оилалари аъзоларидан фарқли ўлароқ, Имон Афзон жамоат ҳаётида фаол иштирок этади. У Англиянинг Ноттингем университетида сиёсатшунослик бўйича таълим олган ва Малайзияга қайтгач, ижтимоий фаолият билан шуғуллана бошлаган. У Қироллик руҳий саломатлик жамғармасининг ҳомийси сифатида кам таъминланган оилаларга ёрдам кўрсатади ва меҳрибонлик уйларидаги ўсмирларнинг таълим олишига кўмаклашади. Шунингдек, у фуқароларнинг руҳий фаровонлигини яхшилашга қаратилган ислоҳотларни қўллаб-қувватлайди.

Амалдаги қонунчилик Имон Афзоннинг Малайзия қироличаси бўлишига имкон бермаса-да, у аллақачон халқ ҳаётидаги фаол иштироки туфайли севимли шахсга айланган. Шу билан бирга, унинг сиёсий фаоллиги унинг доимо замонавий ва нафис кўринишига халақит бермайди, бу ҳақда ижтимоий тармоқлардаги мухлислари мунтазам равишда таъкидлаб ўтишади.

Како — Япония маликаси

Япония императорлик оиласига мансуб Како тахт ворислиги тизимида иккинчи ўринда турган, бироқ император бўлмаган шаҳзода Фумиҳитонинг қизи ҳисобланади. Бевосита тахт вориси бўлмаса-да, Како жамият ҳаётида фаол иштирок этади. У табиий офатлардан жабрланганларга кўмаклашади, хайрия ишлари билан шуғулланади ва шеърлар битади. 2014 йилда вояга етгач, япон халқига садоқат қасамини ичган илк малика унвонига сазовор бўлди.

Амалдаги императорнинг ҳам қизи, малика Аико мавжуд бўлса-да, жамоатчилик эътибори айнан Какога қаратилган. Унда бувиси, императорлик оиласига мансуб бўлмаган биринчи аёл сифатида валиаҳд шаҳзода Акиҳитога турмушга чиққан малика Митикога ўхшашлик кўришади. Малика Како меҳрибонлиги, нозик диди ва фуқароларга ғамхўрлиги туфайли эъзозланади.

Эзурин Хайра — Малайзия маликаси 

Малайзия фуқаролари Эзуриннинг қирол Тунку Дато Якоб Хайрага турмушга чиқиб, амалда мамлакатни бошқарган даврларини деярли унутиб юборган. Бугунги кунда у ҳашаматли турмуш тарзи билан танилган: Эзурин вақтининг кўп қисмини Европа ва АҚШда ўтказиб, мода намойишларида қатнашади ҳамда ижтимоий тармоқларида қимматбаҳо кийимларни кўз-кўз қилади.

Эри билан ажрашгандан сўнг, Эзурин “Уй” номли реалити-шоу лойиҳасини эълон қилди. Унда у ва беш фарзанди одатий ҳашаматли ҳаётдан воз кечиб, чекка қишлоқда яшашга мослашишга ҳаракат қилишди. Бу лойиҳа катта қизиқиш уйғотди, айниқса, собиқ модел сифатида танилган Эзурин қироллик оиласи доирасида ҳам ҳаддан ташқари дабдабага берилгани учун кўп танқидга учраганди.

Сириваннавари Нариратана — Таиланд маликаси 

Таиланд қироли Рама Х ва актриса Ювадхида Сурацавадининг қизи Сириваннавари монархлар анъаналарини бузмоқда. Таиланд тахтининг меросхўрлик қаторида учинчи ўринда турса-да, у тадбиркорликни танлаган. Парижда мода бўйича магистратурани тугатгач, Шарқ ва Ғарб услубларини уйғунлаштириб, ноёб кийимлар таклиф этувчи ўз брендини яратди.

Бироқ унинг шуҳрати мода доирасидан ташқарига чиқиб кетди. Сириваннавари кўпинча энг замонавий инсонлар рўйхатига киритилади, Париж ва Миландаги йирик мода тадбирларига қатнашади ҳамда қироллик аъзолари ҳақидаги тасаввурлардан йироқ бўлган дунёвий ҳаёт тарзини кечиради. Шундай бўлса-да, у вақти-вақти билан турли можароларга сабаб бўлади ва жамиятнинг айрим вакиллари орасида норозилик уйғотади.