Леверкузеннинг “Байер” клуби чап қанот ҳимоячиси Алехандро Грималдо “Реал Мадрид” қизиқишлари доирасига тушиб қолди. Бу ҳақда журналист Маттео Моретто хабар берган.
“Қироллик клуби” аввал ҳам футболчини ўз сафига қўшиб олишни истаётгани ҳақида миш-мишлар тарқалган, бироқ музокаралар якунланмай қолган эди.
Манбага кўра, мадридликлар бош мураббийлигига тайинланиши кутилаётган Хаби Алонсо Грималдонинг майдондаги ҳаракатларини ёқтиради ва у билан “Реал”да ҳам бирга ишлашни истамоқда.
Мадрид клуби раҳбарияти 29 ёшли испаниялик футболчини сотиб олиш бўйича музокара бошлаш арафасида турибди. Ҳозир асосий муаммо “Байер” ҳисобланади. Сабаби немис клуби вазиятни яхши билади ва иложи борича ҳимоячини қимматроққа пуллашни истамоқди.
Transfermarkt Грималдонинг қийматини 40 миллион еврога баҳоламоқда. Футболчининг “Байер” билан шартномаси 2027 йилнинг ёзига қадар амал қилади. Ҳимоячи жорий мавсум леверкузенликлар сафида 47 учрашувда майдонга тушиб, 4 гол ва 12 ассист муаллифига айланган.
Маълумот учун, Алехандро “Барселона” академияси тарбияланувчиси ҳисобланади. У 2008 йилдан 2016 йилга қадар каталонияликлар тизимида фаолият юритган. Кейин Португалиянинг “Бенфика” клуби ва ҳозир “Байер” шарафини ҳимоя қилмоқда.
Изоҳ (0)