Мадриднинг “Реал” клуби сафида иккинчи мавсумини ўтказаётган туркиялик футболчи Арда Гюлер жамоага янги келганида юз берган қизиқарли воқеани сўзлаб берди.
Арданинг айтишича, “қироллик клуби” аъзолари уни жуда яхши кутиб олишган ва унга “аби” яъни ака лақабини беришган:
“Реал”га келганимда Давид Алаба ва Антонио Рюдигер бир оз турк тилини тушунишаркан. Улар ёшлигидан Берлин ва Венада турк муҳожирлар орасида улғайишган. Ҳатто Алаба “Галатасарай”нинг ашаддий мухлиси эканлигидан хабар топдим. Тибо Куртуа эса Арда Туран билан бир жамоада тўп сурган, шунинг учун у ҳам турк тилидан баъзи — асосан ёмон сўзларни билади, дейди Арда.
Аммо воқеанинг энг қизиқ жойи олдинда эди. Гюлер турк одатларига кўра, катталарга ҳурмат билан “аби” яъни “ака” деб мурожаат қилади. “Реал” афсонаси Лука Модрич билан илк учрашувда: “Салом, Лука аби,” деган.
Модрич отам ёшидаги одам. Уни оддий “Лука” деб чақира олмасдим. Шунинг учун “Лука аби” дедим, дейди Арда.
Бу сўзларни эшитган Алаба ва Рюдигер эса “аби” ҳаммани чақириш учун ишлатилади деб ўйлаган ва кейинги кунлар машғулот майдонида Гюлерни “хайрли тонг, аби” деб кутиб олишган. Шундан бери туркиялик футболчининг лақаби Арда аби бўлиб қолган.
Энди кеч. Ҳозир мен “расмий” равишда “Реал”даги энг ёши катта футболчи — Арда абиман, дея эслайди ёш футболчи.
Изоҳ (0)