“Qalblar malikasi” oramizda yo‘qligiga qariyb 28 yil bo‘ldi. Shunga qaramay, malika Diananing sirli o‘limi hanuzgacha barchada katta qiziqish uyg‘otmoqda. Charlz III ning sobiq rafiqasini fojia sari nima olib borgan edi?
Qirollik oilasi hayotini kuzatuvchi ekspertlarning fikricha, Diana hayotining so‘nggi kunida tushib qolgan vaziyati ko‘ringanidan ham murakkabdir. Malika bunday voqealar markazida bo‘lishiga aslida uning o‘zi sababchi bo‘lgan bo‘lishi mumkin.
Diana so‘nggi yozini Sen Tropedagi yaxtada o‘tkazdi. Charlz bilan ajrashganidan so‘ng, malika ham, uning sobiq eri ham o‘g‘illari Uilyam va Garri bilan bir xil muddatda birgalikda vaqt o‘tkazish huquqiga ega edi.
Diana farzandlarini Misr milliarderlaridan biri — Muhammad Al-Fayidning yaxtasiga olib borgan. Malika yaqin do‘stlarining aytishicha, u o‘sha damlarda o‘zini juda baxtli his qilgan.
So‘ng oradan bir necha kun o‘tib, Diananing yaxtadagi suratlari matbuotda paydo bo‘ldi. Buni ko‘rgan barcha hayratdan yoqa ushlagan edi: jurnalistlarga Sen Tropedagi malika haqida kim xabar berdi? Diananing yaqinlari avvaliga bunda yaxta xodimlarini aybladi, ammo keyinchalik ma’lum bo‘lishicha, bularning ortida malikaning o‘zi turgan.
Qirollik biografi Tina Braunning fikricha, Diana bu suratlar ommaga tarqalishini o‘zi istagan. O‘sha paytda hissiyotlarga berilgan malika hali ham shifokor Hasnat Xon bilan ajrimdan keyin o‘ziga kelmagan edi. Sen Tropening go‘zal manzaralari unga “qasos olish” uchun ayni muddao bo‘lib tuyulgan. Tina Braun bu haqda Palace Papers nashrida shunday yozadi:
Diana shaxsiy hayotiga aralashishga yo‘l ochib bergan edi, u ko‘pincha injiqlik sababli hayotidagi erkaklarni rashk qilishga majbur qilishni istagan. Aynan o‘zi italiyalik suratkash Mario Brennaga manzilini bergan va shu orqali Hasnat Xonga istehzoli xabar yubormoqchi bo‘lgan.
Bunday “qaynoq” suratlardan keyin paparatssi malikani soya kabi ta’qib qilgani ajablanarli emas. Buning uchun Diana Al-Fayidlar oilasiga chuqur minnatdorchilik bildirgan. So‘ng Muhammadning o‘g‘li Dodi unga Parijda uchrashuv taklif qilganida malika rad javobi bera olmagan. Fransiyaning poytaxtida ham Dodi bilan birga malika Diananing jurnalistlardan qochishi deyarli imkonsiz bo‘lgan, ular mashhurlarning har bir qadamini kuzatib borishgan.
Parijga yetib kelgach, Diana va Dodi shahardagi mashhur “Ritz” mehmonxonasiga joylashgan. Bu mehmonxona Al-Fayidlar oilasiga tegishli bo‘lib, u yerda juftlik paparatssidan ozgina bo‘lsa-da, panoh topishga umid qilgan. Ammo ularning har bir harakati yuzlab kameralar ostida bo‘lgan.
Dodi va Diana kechki ovqatdan so‘ng paparatssilardan yashirinish maqsadida orqa eshikdan chiqishga qaror qilishgan va Mercedes-Benz S280 rusumli mashinaga o‘tirgan. Avtomobilni Dodi Al-Fayidning xavfsizlik xodimi Anri Pol boshqarayotgan edi. Taxminlarga ko‘ra, haydovchi mast holatda bo‘lgan.
Tungi soat 00:20 atrofida Sena daryosi bo‘yidagi mashhur Pont de l’Alma tunneliga kirgan avtomobil katta tezlikda harakatlanayotib boshqaruvni yo‘qotgan va tunnel devoriga urilgan. Dodi va Anri voqea joyida halok bo‘lgan. Diana esa og‘ir tan jarohatlari bilan kasalxonaga yetkazilgan. Soat 4:00 da shifokorlar uni qutqarib qololmasligini e’lon qilishgan.
Keyinchalik o‘tkazilgan tergov natijalari avtohalokatda haydovchi Anri Polning mast holatda mashina boshqargani va paparatssilarning mashinani ta’qib qilgani halokatga sabab bo‘lganini ko‘rsatdi. Shunga qaramay, ko‘pchilik hanuzgacha bu voqeada turli fitnalarni va qirollik oilasining aralashuvini taxmin qiladi.
Izoh (0)