Россия Федерациясининг Краковдаги бош консулхонаси ўз фаолиятини камида 30 кундан сўнг якунлаши лозим. Бу ҳақда Польша ташқи ишлар вазири ўринбосари Хенрика Моссицкая-Дендис маълум қилди.
“Познандаги консуллик билан бўлгани каби, Россия томонига дипломатик муассасани ёпиш учун одатда камида 30 кунлик муддат берилади”, деб айтди дипломат ТВП Инфо телеканали жонли эфирида ўтказилган брифингда.
Шунингдек, Польша ТИВ раҳбари ўринбосари журналистнинг персона нон грата деб эълон қилинадиган консуллик ходимлари ҳақидаги саволига жавоб берган.
“Бу қарор фақат дипломатларга тегишли. Ёрдамчи ва маъмурий ходимларга бу қарор тааллуқли эмас”, дея изоҳ берди Моссицкая-Дендис.
Маълумотларга кўра, Россиянинг Краковдаги бош консулхонасида 3 нафар дипломат ва 4 нафар маъмурий-техник ходим аккредитациядан ўтган.
12 май куни Польша ТИВ раҳбари Радослав Сикорский Россиянинг Краковдаги бош консулхонасини ёпиш тўғрисидаги қарорни эълон қилди. У бу чорани ўтган йилнинг май ойида ёнғин юз берган Маривилская кўчасидаги савдо марказига ўт қўйишда Россия махсус хизматларининг исботланган иштироки билан асослади. Россия ТИВ расмий вакили Мария Заҳарова Москва яқин келажакда Варшаванинг ноўрин қадамларига муносиб жавоб беришини маълум қилди.
Россия Федерацияси ва Польша муносабатлари сўнгги йилларда сезиларли даражада ёмонлашди. Москва Варшавани кескин русофобияда айблади. Польша ҳукумати Россия Федерациясининг танқиди ва эътирозларига қарамай, совет ёдгорликларини бузмоқда, Россия мулкини мусодара қилмоқда. Варшаванинг хатти-ҳаракатларига жавобан Москва Польшани душман давлатлар рўйхатига киритди. Шунингдек, ўнлаб полшалик дипломатлар ва консуллик ходимларини мамлакатдан чиқариб юборди.
Изоҳ (0)