Германия, Япония ва Польша каби давлатлар ўзбекистонликларга бўш иш ўринларини таклиф этмоқда

Чет элда ишламоқчи бўлган Ўзбекистон фуқаролари учун Германия, Исроил, Япония, Россия, Латвия, Литва, Болгария, Польша давлатларига бўш иш ўринлари таклиф этилмоқда. Бу ҳақда Ташқи меҳнат миграцияси агентлиги хабар берди.

Қайд этилишича, хорижнинг ваколатли ташкилотлари ва салоҳиятли иш берувчилари билан олиб борилган музокаралар натижасида Буюк Британия, Болгария, Латвия, Польша, Германия, Россия, Қозоғистон каби давлатлардан 33 та ташкилот билан ҳамкорлик келишувлари имзоланиб, уларда 4,5 мингдан ортиқ бўш иш ўринлари аниқланган.

Ҳисобот даврида Россия, Жанубий Корея, Буюк Британия, Литва, Болгария каби давлатларда жами 3 186 нафар Ўзбекистон фуқароси манзилли ишларга жойлаштирилган.

Агентлик фаолиятининг меҳнат мигрантлари ҳуқуқ ва манфаатларини ҳимоя қилиш, моддий ёрдам кўрсатиш йўналишида жами 42 мингдан ортиқ фуқарога хизмат кўрсатилган. Шундан, 37 мингдан ортиғига маслаҳат хизмати, 1 900 га яқинига ҳуқуқий, 2 250 га яқинига ижтимоий, 700 га яқинига моддий, шундан, 423 нафарига қарийб 22 минг АҚШ доллари миқдорида бир марталик моддий ёрдам кўрсатилган.

Шунингдек, 28 нафар фуқаро вақтинчалик хостелларга жойлаштирилган, оғир вазиятларга тушиб қолган 136 нафар ўзбекистонлик мамлакатга олиб келинган. Агентликнинг хориждаги ваколатхоналари аралашуви билан Ўзбекистон фуқароларига иш берувчиларидан 300 минг АҚШ долларидан ортиқ миқдорида иш ҳақлари ундириб берилган.

Меҳнат миграцияси географиясини кенгайтириш борасида дунёнинг кўплаб ривожланган давлатлари ваколатли ташкилотлари ва салоҳиятли иш берувчилари билан музокаралар олиб борилмоқда ва фуқароларни ушбу давлатларга ишга жалб қилиш бўйича эришилган келишувлар ҳамда бўш иш ўринлари ҳақида қўшимча маълум қилинади.

Бугунги кунда Германия, Исроил, Япония, Россия, Латвия, Литва, Болгария, Польша каби давлатларда тиббиёт, ҳайдовчилик, қурилиш, ишлаб чиқариш ва хизмат кўрсатишнинг турли соҳаларида бўш иш ўринлари таклиф этилмоқда.

Ушбу бўш иш ўринлари бўйича хорижий тилларни биладиган ва малакага эга фуқаролар агентликка мурожаат қилишлари мумкин.

Аввалроқ Россияда 200 минг нафар ўзбекистонлик норасмий ишлаётгани маълум қилинганди. Шунингдек, Бандлик ва меҳнат муносабатлари вазирлиги бошқарма бошлиғи Зоҳид Асқаров айрим фирибгарлар чет элга ишлаш учун юборишини айтиб фуқаролардан 6 минг долларгача пул олаётгани, алданганлар пулдан ҳам, хорижда ишлашдан ҳам қуруқ қолаётганини айтганди.